നിങ്ങളുടെ ആദ്യ വോട്ട് ബാലാക്കോട്ടില്‍ വ്യോമാക്രമണം നടത്തിയവര്‍ക്ക് സമര്‍പ്പിക്കുമോ?; മോദിയുടെ ചോദ്യത്തില്‍ റിപ്പോര്‍ട്ട് തേടി തെരഞ്ഞെടുപ്പ് കമ്മിഷന്‍ 

ന്യൂഡല്‍ഹി: ബാലാക്കോട്ട് വ്യോമാക്രമണവുമായി ബന്ധപ്പെട്ട് പ്രധാനമന്ത്രി നരേന്ദ്രമോദി നടത്തിയ പരാമര്‍ശത്തില്‍ റിപ്പോര്‍ട്ട് തേടി തെരഞ്ഞെടുപ്പ് കമ്മിഷന്‍. താങ്കളുടെ ആദ്യ വോട്ട് വ്യോമാക്രമണം നടത്തിയവര്‍ക്ക് സമര്‍പ്പിക്കുമോ എന്ന മോദിയുടെ ചോദ്യത്തിലാണ് തെരഞ്ഞെടുപ്പ് കമ്മിഷന്റെ ഇടപെടല്‍. ഇതുമായി ബന്ധപ്പെട്ട് മഹാരാഷ്ട്ര സംസ്ഥാന മുഖ്യ തെരഞ്ഞെടുപ്പ് ഓഫീസറോടാണ്  തെരഞ്ഞെടുപ്പ് കമ്മിഷന്‍ റിപ്പോര്‍ട്ട് തേടിയത്.

മഹാരാഷ്ട്രയിലെ ലത്തൂരില്‍ തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു മോദി. 'ആദ്യമായി വോട്ടുചെയ്യാന്‍ പോകുന്നവരോട് എനിക്ക് ഒരു കാര്യം പറയാനുണ്ട്.പാകിസ്ഥാനില്‍ വ്യോമാക്രമണം നടത്തിയ ധീരജവാന്മാര്‍ക്ക് വേണ്ടി നിങ്ങളുടെ ആദ്യ വോട്ട് സമര്‍പ്പിക്കാന്‍ കഴിയുമോ?, പുല്‍വാമ ഭീകരാക്രമണത്തില്‍ വീരമൃത്യ വരിച്ച ജവാന്മാര്‍ക്കായി നിങ്ങളുടെ ആദ്യ വോട്ട് സമര്‍പ്പിക്കാന്‍ കഴിയുമോ?' മോദിയുടെ ഈ ചോദ്യങ്ങളാണ് തെരഞ്ഞെടുപ്പ് കമ്മിഷന്‍ പരിശോധിക്കുന്നത്.

സേനയുടെ പ്രവര്‍ത്തനങ്ങള്‍ തെരഞ്ഞെടുപ്പ് പ്രചാരണത്തിനായി ഉപയോഗിക്കരുത് എന്ന് കഴിഞ്ഞമാസം തെരഞ്ഞെടുപ്പ് കമ്മിഷന്‍ മാര്‍ഗനിര്‍ദേശം നല്‍കിയിരുന്നു. ഇതിന്റെ അടിസ്ഥാനത്തിലാണ് തെരഞ്ഞെടുപ്പ് കമ്മിഷന്റെ നടപടി.