ന്യൂഡല്‍ഹി: പ്രധാനമന്ത്രി നരേന്ദ്ര മോദിയുടെ 'പക്കോട' പരാമര്‍ശത്തിനെതിരെ സര്‍വകലാശാലയില്‍ പക്കോട ഉണ്ടാക്കി പ്രതിഷേധിച്ച വിദ്യാര്‍ഥിക്ക് 20,000 രൂപ പിഴ. ജവഹര്‍ലാല്‍ നെഹറു സര്‍വകലാശാലയില്‍ നാല് വിദ്യാര്‍ഥികള്‍ ചേര്‍ന്ന് പക്കോട ഉണ്ടാക്കി പ്രതിഷേധിച്ചതിനാണ് എംഫില്‍ വിദ്യാര്‍ഥി മനീഷ് കുമാര്‍ മീണയ്ക്ക് പിഴ ചുമത്തിയത്. പത്ത് ദിവസത്തിനുള്ളില്‍ കോളെജ് ഹോസ്റ്റലില്‍ നിന്ന് താമസം മാറണമെന്നും മനീഷിന് നിര്‍ദ്ദേശം നല്‍കിയിട്ടുണ്ട്.
പക്കോട വില്‍ക്കുന്ന ഒരാള്‍ ദിവസം 200രൂപ സമ്പാദിക്കുന്നുണ്ടെന്നും അയാളെ തൊഴില്‍രഹിതനെന്ന് വിളിക്കാനാവില്ലെന്നും പ്രധാനമന്ത്രി അടുത്തിടെ പറഞ്ഞിരുന്നു. ഇതിനെ പരിഹസിച്ചാണ് വിദ്യാര്‍ഥികള്‍ പ്രതിഷേധം നടത്തിയത്. സംഭവത്തില്‍ വിദ്യാര്‍ഥികള്‍ക്കെതിരെ സര്‍വകലാശാല അധികൃതര്‍ അന്വേഷണം നടത്തുകയും പിന്നീട് മനീഷിന് നോട്ടീസ് അയക്കുകയുമായിരുന്നു. ജൂലൈ 21നകം വിശദീകരണം നല്‍കി പിഴ അടക്കണമെന്നും ഹോസ്റ്റല്‍ മാറണമെന്നുമാണ് നോട്ടീസിന്റെ ഉള്ളടക്കം.
തന്റെ പ്രതിഷേധ പ്രവര്‍ത്തികള്‍ വഴി സര്‍വകലാശാലയില്‍ ഒരു സാമ്പത്തിക നഷ്ടവും സംഭവിച്ചിട്ടില്ലെന്നും പ്രധാനമന്ത്രിയെ ബോധിപ്പിക്കാനാണ് ഇത്തരത്തിലൊരു നിലപാടെടുത്തിട്ടുള്ളതെന്നും മനീഷ് പറഞ്ഞു. രാജ്യത്തെ ജനങ്ങളോട് പക്കോട ഉണ്ടാക്കി ജീവിച്ചോളാന്‍ പറഞ്ഞ പ്രധാനമന്ത്രിയുടെ വാക്കുകളില്‍ പരിഹാസമാണ് തനിക്ക് കാണാന്‍ കഴിഞ്ഞതെന്നും ആ വാക്കുകള്‍ തന്നെ ആശങ്കപ്പെടുത്തിയതിനാലാണ് പ്രതിഷേധിച്ചതെന്നും മനീഷ് പ്രതികരിച്ചു.
സര്‍വകലാശാലയുടെ നിലപാട് ഖേതകരമാണെന്നും മനീഷ് പറഞ്ഞു. താന്‍ അവസാന പരീക്ഷകള്‍ക്കായി തയ്യാറെടുക്കുകയാണെന്നും പിഴ അടയ്ക്കാനുള്ള തുക തന്റെപക്കല്‍ ഇല്ലെന്നും അദ്ദേഹം പറഞ്ഞു. തന്നോട് ഹോസ്റ്റല്‍ മാറണമെന്ന് ആവശ്യപ്പെട്ടെങ്കിലും ഏത് ഹോസ്റ്റലിലേക്കാണ് മാറേണ്ടതെന്ന് നോട്ടീസില്‍ പറഞ്ഞിട്ടില്ലെന്നും മനീഷ് കൂട്ടിച്ചേര്‍ത്തി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
