ചെന്നൈ: കോവിഡ് ഭീതിയുടെ പശ്ചാത്തലത്തില്‍ പരീക്ഷയെക്കാള്‍ കൂടുതല്‍ പ്രാധാന്യം നല്‍കുന്നത് വിദ്യാര്‍ഥികളുടെ സുരക്ഷയ്‌ക്കെന്ന് കേന്ദ്ര മാനവ വിഭവശേഷി മന്ത്രി രമേശ് പൊഖ്രിയാല്‍. വിദ്യാര്‍ഥികളുടെ വിദ്യാഭ്യാസവും പ്രധാനമാണ്. ഇത് കണക്കിലെടുത്ത് എല്ലാവരിലേക്കും ഓണ്‍ലൈന്‍ വിദ്യാഭ്യാസം എത്തിക്കുന്നതിന് വേണ്ടിയുളള പ്രവര്‍ത്തനമാണ് ഊര്‍ജ്ജിതമായി നടന്നുവരുന്നതെന്നും രമേശ് പൊഖ്രിയാല്‍ പറഞ്ഞു. ദി ന്യൂ ഇന്ത്യന്‍ എക്‌സ്പ്രസ് സംഘടിപ്പിക്കുന്ന എക്‌സ്പ്രഷന്‍സ് പരമ്പരയില്‍ ദി ന്യൂ ഇന്ത്യന്‍ എക്‌സ്പ്രസ് എഡിറ്റോറിയല്‍ ഡയറക്ടര്‍ പ്രഭു ചാവ്ളയുടെ ചോദ്യങ്ങള്‍ക്ക് മറുപടി പറയുകയായിരുന്നു കേന്ദ്രമന്ത്രി.
രാജ്യത്തെ കോവിഡ് വ്യാപനത്തിന്റെ സ്ഥിതിഗതികള്‍ വിലയിരുത്തിയശേഷം അനുകൂലമെന്ന് കണ്ടാല്‍ വിദ്യാലയങ്ങള്‍ തുറക്കുന്നത് സംബന്ധിച്ച് തീരുമാനമെടുക്കും. നിലവില്‍ വിദ്യാര്‍ഥികളുടെ സുരക്ഷയ്ക്കാണ് പ്രാധാന്യം നല്‍കുന്നത്. വിദ്യാര്‍ഥികള്‍ രാജ്യത്തിന്റെ ഭാവിയാണ്. കോവിഡ് വ്യാപന കാലത്ത് അവരുടെ ക്ഷേമത്തിനാണ് കൂടുതല്‍ പ്രാധാന്യം നല്‍കുന്നതെന്നും മന്ത്രി പറഞ്ഞു.
കഴിഞ്ഞ രണ്ടുമാസം വിദ്യാര്‍ഥികളെ സംബന്ധിച്ച് ഏറ്റവും ബുദ്ധിമുട്ടേറിയ കാലമായിരുന്നു. ഈ സമയത്ത് 33 കോടി വിദ്യാര്‍ഥികളുമായി ആശയവിനിമയം നടത്തി സ്ഥിതിഗതികള്‍ വിലയിരുത്തി. പല സുപ്രധാന തീരുമാനങ്ങളും കൈക്കൊണ്ടത് ഇതിന്റെ അടിസ്ഥാനത്തിലാണ്. വിദ്യാര്‍ഥികളുടെ സുരക്ഷയ്ക്ക് പുറമേ അക്കാദമിക വര്‍ഷം നഷ്ടപ്പെടാതിരിക്കാനുളള നടപടികളുമാണ് സര്‍ക്കാര്‍ സ്വീകരിച്ചു വരുന്നത്. ഓണ്‍ലൈന്‍ വിദ്യാഭ്യാസം സാധ്യമാക്കാന്‍ യുജിസി പ്രവര്‍ത്തനങ്ങളുമായി മുന്നോട്ടുപോകുകയാണ്. എല്ലാ വിദ്യാര്‍ഥികള്‍ക്കും ഓണ്‍ലൈന്‍ വിദ്യാഭ്യാസം സാധ്യമാക്കുന്നതിന് വേണ്ടിയാണ് സര്‍ക്കാര്‍ പരിശ്രമിക്കുന്നതെന്നും രമേശ് പൊഖ്രിയാല്‍ പറഞ്ഞു.
ഗ്രാമീണ മേഖലയിലെ വിദ്യാര്‍ഥികള്‍ക്ക് ലാപ്പ്‌ടോപ്പ്, ഫോണ്‍ സൗകര്യം ലഭ്യമല്ലെങ്കില്‍ ടിവിയിലൂടെ ഓണ്‍ലൈന്‍ വിദ്യാഭ്യാസം സാധ്യമാക്കാനാണ് നടപടി സ്വീകരിച്ചുവരുന്നത്. വിദ്യാര്‍ഥികളെ സഹായിക്കാന്‍ ആപ്പുമായി വരുന്ന കമ്പനികളുമായി സഹകരിക്കാന്‍ സര്‍ക്കാര്‍ തയ്യാറാണെന്നും മന്ത്രി പറഞ്ഞു. കുട്ടികള്‍ ക്ലാസുകളിലേക്ക് വരുന്നതിന് മുന്‍പ് കോവിഡ് വ്യാപനം തടയുന്നതിനുളള മുന്‍കരുതല്‍ നടപടികള്‍ സ്വീകരിക്കുന്നതില്‍ സ്‌കൂളുകള്‍ വേണ്ട തയ്യാറെടുപ്പുകള്‍ എടുത്തിട്ടുണ്ട് എന്ന് ഉറപ്പാക്കേണ്ടതുണ്ട്. രാജ്യത്തെ വിദ്യാലയങ്ങള്‍ തുറക്കാന്‍ തീരുമാനിച്ചാല്‍ ഇക്കാര്യം അതത് സംസ്ഥാനങ്ങളെ അറിയിക്കും. ആരോഗ്യമന്ത്രാലയം പുറപ്പെടുവിച്ചിട്ടുളള മാര്‍ഗനിര്‍ദേശങ്ങള്‍ കൃത്യമായി പാലിക്കാന്‍ വേണ്ട നടപടികളും സ്വീകരിക്കുമെന്നും മന്ത്രി പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
