തിരുനെല്‍വേലി: പെട്രോള്‍ പമ്പില്‍ വെച്ച് ബൈക്കിന് തീപിടിച്ചു. ഒഴിവായത് വന്‍ ദുരന്തം. തമിഴ്‌നാട്ടിലെ തിരുനെല്‍വേലിയിലാണ് അപകടകരമായ സംഭവം അരങ്ങേറിയത്. ബൈക്കുടമയെ പരിക്കുകളോടെ ആശുപത്രിയില്‍ പ്രവേശിപ്പിച്ചിരിക്കുകയാണ്.
ഇന്ധനം നിറയ്ക്കാനായി തിരുനെല്‍വേലി പെട്രോള്‍ സ്‌റ്റേഷനിലെത്തിയ യുവാവ് ഫുള്‍ടാങ്ക് പെട്രോള്‍ അടിച്ചതിന് ശേഷം പൈസ നല്‍കി പോകാനൊരുങ്ങുമ്പോഴാണ് അപകടമുണ്ടായത്. ബൈക്ക് സ്റ്റാര്‍ട്ട് ചെയ്തയുടന്‍ തീപിടുത്തമുണ്ടായി. യുവാവിന്റെ അരയ്ക്ക് കീഴ്‌പ്പോട്ടുള്ള ഭാഗത്തും തീപിടിച്ചു.
ഉടനെ ബൈക്ക് താഴെയിട്ട് ഇറങ്ങി ഓടിയ യുവാവിനെ പെട്രോള്‍ പമ്പ് ജീവനക്കാരാണ് രക്ഷപ്പെടുത്തിയത്. ഉടന്‍ തന്നെ പെട്രോള്‍ പമ്പിലെ തീയും അണച്ചു. സംഭവത്തിന്റെ ഞെട്ടിപ്പിക്കുന്ന സിസിടിവി ദൃശ്യങ്ങള്‍ പ്രചരിക്കുന്നുണ്ട്. പെട്രോള്‍ ടാങ്കിന്റെ കപ്പാസിറ്റിക്ക് അപ്പുറം ഇന്ധനം നിറച്ചതിനാലാണ് തീപിടുത്തമുണ്ടായതെന്നാണ് പ്രാഥമിക നിഗമനം. സംഭവത്തെക്കുറിച്ച് കൂടുതല്‍ അന്വേഷണം നടന്നു വരികയാണെന്ന് പൊലീസ് അറിയിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
