പൊലീസ് ബാരിക്കേഡിലെ ഇരുമ്പുവയര്‍ കൊലക്കയറായി, വയര്‍ കഴുത്തില്‍ കുരുങ്ങി ബൈക്ക് യാത്രികന് ദാരുണാന്ത്യം 

ന്യൂഡല്‍ഹി: പൊലീസ് ബാരിക്കേഡിലെ ഇരുമ്പുവയര്‍ കഴുത്തില്‍കുരുങ്ങി ബൈക്ക് യാത്രികന്‍ മരിച്ചു. ബാരിക്കേഡുകളെ തമ്മില്‍ ബന്ധിപ്പിച്ചിരുന്ന ഇരുമ്പുവയറില്‍ കുരുങ്ങി കഴുത്ത് മുറിഞ്ഞാണ് ദാരുണാന്ത്യം. 

വടക്കുപടിഞ്ഞാറ് ഡല്‍ഹിയിലെ നേതാജി സുബാഷ് പ്ലേസില്‍ ഇന്ന് പുലര്‍ച്ചെയാണ് സംഭവം. ഓണ്‍ലൈന്‍ കാബ് ഡ്രൈവറായ ഇരുപതിയൊന്നുകാരന്‍ അഭിഷേകാണ് മരിച്ചത്. 

കഴുത്തില്‍ വയറുകുരുങ്ങിയാണ് അഭിഷേക് മരിച്ചതെന്ന് പൊലീസ് സ്ഥിരികരിച്ചു. മൃതദേഹ പരിശോധന പൂര്‍ത്തിയായാല്‍ മാത്രമേ ഇതുസംബന്ധിച്ച് കൂടുതല്‍ വ്യക്തത വരുകയുളളുവെന്നും പൊലീസ് വ്യക്തമാക്കി. 

ബാരിക്കേഡുകള്‍ക്കിടയില്‍ ബൈക്ക് പാര്‍ക്ക് ചെയ്യുന്നതിനിടയില്‍ ഇരുമ്പുവയറ് ശ്രദ്ധയില്‍പ്പെടാതിരുന്നതാകാം അപകടകാരണമെന്ന് പൊലീസ് സംശയിക്കുന്നു. കൃത്യവിലോപം ചൂണ്ടികാണിച്ച് ഒരു സബ് ഇന്‍സ്‌പെക്ടറെയും നാലു പൊലീസ് ഉദ്യോഗസ്ഥരെയും സസ്‌പെന്‍ഡ് ചെയ്തു.