പട്‌ന : ബിഹാര്‍ നിയമസഭ തെരഞ്ഞെടുപ്പില്‍ മഹാസഖ്യത്തിന്റെ ഭാഗമായി മല്‍സരിക്കുന്ന സിപിഐ സ്ഥാനാര്‍ത്ഥികളെ പ്രഖ്യാപിച്ചു. ബാക്രി, തേംഗ്ര, ബച്ച്‌വാര, ഹാര്‍ലഖി, ജാന്‍ജാര്‍പൂര്‍, രൂപോലി എന്നീ ആറു മണ്ഡലങ്ങളിലാണ് സിപിഐ മല്‍സരിക്കുന്നത്.
മധുബനി ജില്ലയിലെ ഹാര്‍ലഖി മണ്ഡലത്തില്‍ നിന്നും പാര്‍ട്ടി സംസ്ഥാന സെക്രട്ടറിയും രണ്ടു തവണ എംഎല്‍എയുമായ രാം നരേഷ് പാണ്ഡേ മല്‍സരിക്കും. മുമ്പ് മൂന്നു തവണ വിജയിച്ച അവധേഷ് കുമാര്‍ റായി ആണ് ബച്ച്‌വാരയില്‍ നിന്നും ജനവിധി തേടുന്നത്.
തേംഗ്രയില്‍ രാം രത്തന്‍ സിങും, ബാക്രിയില്‍ സൂര്യകാന്ത് പാസ്വാനും മല്‍സരിക്കും. പുര്‍നിയ ജില്ലാ സെക്രട്ടറി വികാസ് ചന്ദ്ര മണ്ഡല്‍ ആണ് രുപോലിയില്‍ മല്‍സരിക്കുക. രാം നാരായണ്‍ യാദവ് ജാന്‍ജാര്‍പൂരില്‍ മല്‍സരിക്കുമെന്നും സിപിഐ സംസ്ഥാന സെക്രട്ടറി രാം നരേഷ് പാണ്ഡേ അറിയിച്ചു.
സംസ്ഥാനത്തെ പാര്‍ട്ടിയുടെ ശക്തി അനുസരിച്ച് ലഭിച്ചിരിക്കുന്ന സീറ്റ് വളരെ കുറവാണ്. എന്നാല്‍ ബിജെപിക്കെതിരെ മതേതര വോട്ടുകള്‍ ഭിന്നിച്ചുപോകരുതെന്ന ലക്ഷ്യം മുന്‍നിര്‍ത്തിയാണ് മഹാസഖ്യത്തിന്റെ ഭാഗമായി ഇത്രയും സീറ്റുകളില്‍ മല്‍സരിക്കാന്‍ തയ്യാറായതെന്നും പാണ്ഡേ പറഞ്ഞു.
സംസ്ഥാനത്ത് സിപിഎമ്മും മല്‍സരിക്കുന്ന സ്ഥാനാര്‍ത്ഥികളെ പ്രഖ്യാപിച്ചു. നാലിടത്താണ് സിപിഎം മല്‍സരിക്കുന്നത്. മഹാസഖ്യത്തിലുണ്ടാക്കിയ ധാരണ അനുസരിച്ച് ആര്‍ജെഡി 144 സീറ്റിലും കോണ്‍ഗ്രസ് 70 സീറ്റിലും മല്‍സരിക്കും. ഇടതു പാര്‍ട്ടികള്‍ക്ക് 29 സീറ്റുകളാണ് നല്‍കിയത്. സിപിഐ (എംഎല്‍) ന് 19 സീറ്റ്, സിപിഐക്ക് ആറു സീറ്റ്, സിപിഎമ്മിന് നാലു സീറ്റ് എന്നിങ്ങനെയാകും ലഭിക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
