ഭക്ഷ്യവസ്തുക്കളില്‍ വിഷാംശം കലരാന്‍ സാധ്യത; ഹോം ഡെലിവറി അടക്കമുളള സേവനങ്ങള്‍ നിര്‍ത്തണം, ലുധിയാന ജില്ലാ ഭരണകൂടത്തിന്റെ ഉത്തരവ്

ചണ്ഡീഗഡ്:  കോവിഡ് വ്യാപനം തടയുന്നതിനുളള നിയന്ത്രണങ്ങള്‍ കടുപ്പിച്ച് ലുധിയാന ജില്ലാ ഭരണകൂടം. ഹോം ഡെലിവറി അടക്കം ഭക്ഷ്യോല്‍പ്പനങ്ങളുമായി ബന്ധപ്പെട്ട എല്ലാ സേവനങ്ങളും നിര്‍ത്തിവെയ്ക്കാന്‍ ലുധിയാന ജില്ലാ ഭരണകൂടം ഉത്തരവിറക്കി. ഭക്ഷ്യോല്‍പ്പനങ്ങള്‍ തയ്യാറാക്കുന്ന എല്ലാ സ്ഥാപനങ്ങളോടും പ്രവര്‍ത്തനം നിര്‍ത്തിവെയ്ക്കാനും ജില്ലാ ഭരണകൂടം ആവശ്യപ്പെട്ടു.

കോവിഡ് കേസുകള്‍ വര്‍ധിച്ചുവരുന്ന പശ്ചാത്തലത്തിലാണ് നടപടി. ഇതിന് പുറമേ ഭക്ഷ്യവസ്തുക്കളില്‍ വിഷാംശം കലരാനുളള സാധ്യത മുന്നില്‍ കണ്ടുകൊണ്ടുമാണ് ശക്തമായ നിയന്ത്രണങ്ങള്‍ ഏര്‍പ്പെടുത്തിയത്.

അതിനിടെ പഞ്ചാബില്‍ 60 വയസ്സുകാരന്‍ കോവിഡ് ബാധിച്ച് മരിച്ചു. അമൃതസറില്‍ ചികിത്സയിലിരിക്കേയാണ് മരിച്ചത്. ഇതോടെ സംസ്ഥാനത്ത് കോവിഡ് ബാധിച്ച് മരിച്ചവരുടെ എണ്ണം 14 ആയി. നിലവില്‍ സംസ്ഥാനത്ത് 186 പേര്‍ക്കാണ് കോവിഡ് ബാധ സ്ഥിരീകരിച്ചത്. മോഹാലിയിലാണ് ഏറ്റവുമധികം കേസുകള്‍. 56 പേരാണ് ചികിത്സയില്‍ കഴിയുന്നത്.