അഗര്‍ത്തല: ഭര്‍ത്താവിനെ കൊലപ്പെടുത്തി മൃതദേഹം കിടപ്പുമുറിയില്‍ കുഴിച്ചിട്ട ശേഷം ഭാര്യ പോലീസ് സ്‌റ്റേഷനില്‍ കീഴടങ്ങി. ത്രിപുരയിലെ ധാലായ് ജില്ലയിലെ ഗണ്ഡച്ചേര ഗ്രാമത്തിലാണ് സംഭവം. സഞ്ജിത് റീങ്(30) എന്നയാളെയാണ് ഭാര്യ ഭാരതി (25) തലയ്ക്കടിച്ച് കൊന്നത്. കൃത്യം നടത്തിയ ശേഷം യുവതി പൊലീസ് സ്റ്റേഷനിലെത്തി കീഴടങ്ങുകയായിരുന്നു.
വ്യാഴാഴ്ച വൈകിട്ടാണ് കൊലപാതകം നടന്നത്. തലയില്‍ ഭാരമുള്ള വസ്തു കൊണ്ട് ഇടിച്ചതാണ് മരണകാരണമെന്ന് പ്രാഥമിക നിഗമനമെന്ന് പൊലീസ് സൂചിപ്പിച്ചു. യുവതിയുടെ വെളിപ്പെടുത്തലിനെ തുടര്‍ന്ന് പൊലീസ് സംഘം ഇവരുടെ വീട്ടിലെത്തി പരിശോധന നടത്തി. കിടപ്പുമുറിയില്‍ മണ്ണിട്ട് കുഴിച്ചുമൂടിയ മൃതദേഹം പുറത്തെടുത്തു.
വിശദമായ മൃതദേഹപരിശോധനയ്ക്ക് ശേഷം കൂടുതല്‍ വിവരങ്ങള്‍ ലഭ്യമാകുമെന്നും പൊലീസ് അറിയിച്ചു. എന്നാല്‍ കൊലപാതകത്തിലേക്ക് നയിച്ച കാരണം ഇതുവരെ വ്യക്തമായിട്ടില്ല. അറസ്റ്റ് രേഖപ്പെടുത്തിയ ഭാരതിയെ വിശദമായി ചോദ്യംചെയ്യുന്നതോടെ കൊലപാതക കാരണം വ്യക്തമാകുമെന്നാണ് പൊലീസിന്റെ പ്രതീക്ഷ. സഞ്ജിത് -ഭാരതി ദമ്പതിമാര്‍ക്ക് ആറ് വയസുള്ള മകളുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
