ഭാര്യ കാമുകനൊപ്പം ഓട്ടോയില്‍ 'കറങ്ങി', തടഞ്ഞുനിര്‍ത്തി യുവതിയെ ഇഷ്ടിക കൊണ്ട് തലക്കിടിച്ച് കൊല്ലാന്‍ ശ്രമം, അറസ്റ്റ്

മുംബൈ : ഭാര്യയെ ഇഷ്ടികകൊണ്ട് ഇടിച്ചുകൊല്ലാന്‍ ശ്രമിച്ച കേസിലെ പ്രതി അറസ്റ്റിലായി. മുംബൈ സാന്താക്രൂസ് നിവാസിയായ ലക്ഷ്മണ്‍ അര്‍ജുന്‍ (43) ആണ് പൊലീസിന്റെ പിടിയിലായത്. 

ഏതാനും ദിവസം മുമ്പ് ഭാര്യയും മറ്റൊരാളും ഒരു ഓട്ടോറിക്ഷയില്‍ കയറി പോകുന്നത് ലക്ഷ്മണ്‍ കണ്ടു. ഇവരെ പിന്തുടര്‍ന്ന ലക്ഷ്മണ്‍ വകോല പൈപ്പ്‌ലൈന്‍ റോഡില്‍ വെച്ച് ഓട്ടോ തടഞ്ഞ് ഭാര്യയെ മുടിക്കുത്തിന് പിടിച്ച് വലിച്ചു പുറത്തിട്ടു. തുടര്‍ന്ന് സമീപത്തുകിടന്ന ഇഷ്ടിക എടുത്ത് ഇവരുടെ തലയ്ക്കിടിക്കുകയായിരുന്നു. 

അളുകള്‍ ഓടിക്കൂടിയതോടെ ഇയാള്‍ ഇവിടെ നിന്നും സ്ഥലം വിട്ടു. രണ്ടു തവണ ഇഷ്ടികയ്ക്ക് ഇടിയേറ്റ യുവതി ആശുപത്രിയിലാണ്. വധശ്രമത്തിന് കേസെടുത്ത പൊലീസ് ഇയാളെ കഴിഞ്ഞദിവസം പിടികൂടി. ഇയാളുമായുള്ള ബന്ധത്തെച്ചൊല്ലി ഭാര്യയുമായി വീട്ടില്‍ ദിവസവും വഴക്കുണ്ടാകുമായിരുന്നു എന്ന് ലക്ഷ്മണ്‍ പൊലീസിനോട് പറഞ്ഞു.