ന്യൂഡല്‍ഹി : പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തരമന്ത്രി അമിത് ഷാ, ദേശീയ സുരക്ഷാ ഉപദേഷ്ടാവ് അജിത് ഡോവല്‍ എന്നിവര്‍ക്ക് വധഭീഷണി. പാക് ഭീകരഗ്രൂപ്പായ ജെയ്‌ഷെ മുഹമ്മദാണ് ഭീഷണി മുഴക്കിയിട്ടുള്ളത്. ബ്യൂറോ ഓഫ് സിവില്‍ ഏവിയേഷന്‍ സെക്യൂരിറ്റിക്ക് അടുത്തിടെ കിട്ടിയ സന്ദേശത്തിലാണ് ഭീകരര്‍ മോദിയെയും ഡോവലിനെയും ലക്ഷ്യമിടുന്നതായി വിവരം ലഭിച്ചത്.
ജമ്മു കശ്മീരിന്റെ പ്രത്യേക പദവി ആര്‍ട്ടിക്കിള്‍ 370 റദ്ദാക്കിയ പശ്ചാത്തലത്തിലാണ് ഭീകരസംഘടന പ്രധാനമന്ത്രിയെയും, അമിത് ഷായെയും അജിത് ഡോവലിനെയും ലക്ഷ്യമിടുന്നത്. പദ്ധതി നടപ്പാക്കുന്നതിനായി ജെയ്‌ഷെ മുഹമ്മദ് പ്രത്യേക സ്‌ക്വാഡിന് രൂപം നല്‍കിയതായും റിപ്പോര്‍ട്ടുണ്ട്. വധഭീഷണിയുടെ പശ്ചാത്തലത്തില്‍ രഹസ്യാന്വേഷണ ഏജന്‍സികള്‍ ജാഗ്രതാ നിര്‍ദേശം പുറപ്പെടുവിച്ചു.
മോദിയെയും അമിത് ഷായെയും ഡോവലിനെയും കൂടാതെ, ഇന്ത്യയിലെ 30 നഗരങ്ങളില്‍ ഭീകരാക്രമണം നടത്താനും ജെയ് ഷെ മുഹമ്മദ് പദ്ധതിയിടുന്നതായി രഹസ്യാന്വേഷണ ഏജന്‍സികള്‍ക്ക് വിവരം ലഭിച്ചു. ജമ്മു, പത്താന്‍കോട്ട്, അമൃത്സര്‍, ജയ്പൂര്‍, ഗാന്ധിനഗര്‍, കാണ്‍പൂര്‍, ലക്‌നൗ തുടങ്ങിയ നഗരങ്ങള്‍ ഭീകരരുടെ ഹിറ്റ്‌ലിസ്റ്റില്‍ ഉള്‍പ്പെടുന്നു.
നേരത്തെ മോദിയുടെ മണ്ഡലമായ വാരാണസിയില്‍ വെച്ച് പ്രധാനമന്ത്രിക്ക് നേരെ ഭീകരാക്രമണം നടത്താന്‍ ലഷ്‌കര്‍ ഇ തയ്ബ പദ്ധതിയിട്ടിരുന്നതായി റിപ്പോര്‍ട്ടുകളുണ്ടായിരുന്നു. കൂടാതെ യുപിയിലെ വാരാണസിയില്‍ ഭീകരസംഘനയായ ലഷ്‌കറിന്റെ ഇന്ത്യയിലെ ക്യാംപ് തുറക്കാനും പദ്ധതിയിട്ടിരുന്നതായി സൂചന ലഭിച്ചിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
