മോദിയെ വീണ്ടും തെരഞ്ഞെടുത്തത് ജനങ്ങള്‍; ജനവിധി മാനിക്കുന്നു: രാഹുല്‍ ഗാന്ധി

ന്യൂഡല്‍ഹി: തെരെഞ്ഞടുപ്പ് വിജയത്തില്‍ പ്രധാനമന്ത്രി നരേന്ദ്രമോദിയെ അഭിനന്ദിച്ച് രാഹുല്‍ ഗാന്ധി. ജനവിധിയെ മാനിക്കുന്നു. അമേഠിയിലെ ജനവിധി മാനിക്കുന്നു. സ്മൃതി ഇറാനിക്കും രാഹുല്‍ അഭിനന്ദനമറിയിച്ചു.

'ഈ ദിനം തോല്‍വിയെ പറ്റി ആലോചിക്കാനുള്ള ഒരുദിവസമായി ഞാന്‍ കാണുന്നില്ല. അതിന് കാരണം മോദിയെ വീണ്ടും പ്രധാനമന്ത്രിയാക്കാനുള്ള തീരുമാനം ജനങ്ങളാണ് എടുത്തത്. ഒരു ഇന്ത്യന്‍ എന്ന നിലയില്‍ ജനവിധി താനും അംഗീകരിക്കുന്നുവെന്ന്' രാഹുല്‍ പറഞ്ഞു.

ലോക്‌സഭാ തെരഞ്ഞടുപ്പ് ഫലത്തിന് പിന്നാലെ മാധ്യമങ്ങളെ കാണുകയായിരുന്നു രാഹുല്‍. തെരഞ്ഞടുപ്പില്‍  യുപിഎ സഖ്യം ദയനീയമായി പരാജയപ്പെട്ടിരുന്നു. എന്‍ഡിഎ സഖ്യം 345 സീറ്റുകളിലാണ് ലീഡ് ചെയ്യുന്നത്. ഒറ്റയ്ക്ക് ഭരിക്കാനുള്ള ഭൂരിപക്ഷം ബിജെപി നേടിയിട്ടുണ്ട്. അമേഠിക്ക് പുറമെ വയനാട്ടില്‍ മത്സരിച്ച രാഹുല്‍ നാല് ലക്ഷത്തിലേറെ വേട്ടുകള്‍ക്കാണ് വിജയിച്ചത്.