ലോഡ്ജ് കേന്ദ്രീകരിച്ച് പെൺവാണിഭം ; റെയ്ഡിൽ നാലുപേർ പൊലീസ് പിടിയിൽ, മൂന്നു യുവതികളെ രക്ഷപ്പെടുത്തി

താനെ: മഹാരാഷ്ട്രയിലെ ബയന്ദേറില്‍ ലോഡ്ജ് കേന്ദ്രീകരിച്ച് പെണ്‍വാണിഭം നടത്തിയിരുന്ന നാലംഗസംഘത്തെ പോലീസ് അറസ്റ്റ് ചെയ്തു.  പെണ്‍വാണിഭ സംഘത്തിന്റെ കെണിയില്‍ കുടുങ്ങിയിരുന്ന മൂന്ന് സ്ത്രീകളെ പോലീസ് രക്ഷപ്പെടുത്തി. രഹസ്യവിവരങ്ങളുടെ അടിസ്ഥാനത്തിൽ കഴിഞ്ഞദിവസം പുലർച്ചെ നടത്തിയ റെയ്ഡിലാണ് പെൺവാണിഭ സംഘം കുടുങ്ങിയത്. 

പെൺവാമഇഭ കേന്ദ്രം നടത്തിയിരുന്ന ശരദ് ഷെട്ടി, വസുസിങ് സന്ധു, ശിവപ്രസാദ് ഷെട്ടി, അഖില്‍ ദാഫേദാര്‍ എന്നിവരാണ് അറസ്റ്റിലായത്. ബയന്ദേറിലെ ലോഡ്ജ് കേന്ദ്രീകരിച്ച് പെണ്‍വാണിഭം നടക്കുന്നതായി ഉട്ടാന്‍ കോസ്റ്റല്‍ പോലീസിന് നേരത്തെ വിവരം ലഭിച്ചിരുന്നു. തുടര്‍ന്ന് ലോഡ്ജും പരിസരവും  നിരീക്ഷിച്ചുവന്ന പോലീസ് സംഘം ഞായറാഴ്ച രാത്രിയോടെ റെയ്ഡ് നടത്തിയത്. 

റെയ്ഡിന് മുമ്പായി പൊലീസുകാർ ഇടപാടുകാരെന്ന വ്യാജേന ലോഡ്ജിൽ എത്തിയിരുന്നു. വിവരം സത്യമാണെന്ന് ഉറപ്പാക്കിയ പൊലീസ് സംഘം അറിയിച്ചതിനെ തുടർന്ന് പുറത്ത് കാത്തിരുന്ന പൊലീസ് സംഘം ലോഡ്ജിലേക്ക് ഇരച്ചുകയറുകയായിരുന്നു.  

പെണ്‍വാണിഭസംഘത്തില്‍ നിന്നും രക്ഷപ്പെടുത്തിയ മൂന്ന് സ്ത്രീകളെയും റെസ്‌ക്യൂഹോമിലേക്ക് മാറ്റി. സംഭവത്തില്‍ വിശദമായ അന്വേഷണം നടക്കുകയാണെന്ന് താനെ റൂറല്‍ എ.എസ്.പി അതുല്‍ കുല്‍ക്കര്‍ണി അറിയിച്ചു.