'വരൂ നമുക്ക് ദീപം തെളിയിക്കാം'; വാജ്പേയിയുടെ കവിത പങ്കിട്ട് നരേന്ദ്ര മോദി 

ന്യൂഡൽഹി: അന്തരിച്ച മുന്‍ പ്രധാനമന്ത്രി അടല്‍ ബിഹാരി വാജ്‌പേയി കവിത ആലപിക്കുന്നതിന്റെ വീഡിയോ പങ്കിട്ട് പ്രധാനമന്ത്രി നരേന്ദ്ര മോദി. കൊറോണ വൈറസിനെതിരെയുള്ള പ്രതിരോധ പ്രവര്‍ത്തനങ്ങള്‍ക്ക് ഐക്യദാര്‍ഢ്യം ഉറപ്പു നല്‍കണമെന്ന നിലയിൽ ഞായറാഴ്ച രാത്രി ഒൻപത് മണിക്ക് മുഴുവന്‍ വീടുകളിലും വൈദ്യുതി വിളക്കുകള്‍ അണച്ച് ദീപങ്ങള്‍ തെളിയിക്കണമെന്ന് പ്രധാനമന്ത്രി കഴിഞ്ഞ ദിവസം ആഹ്വാനം ചെയ്തിരുന്നു. ഇക്കാര്യം ഒരിക്കല്‍ കൂടി ഓര്‍മപ്പെടുത്തുക എന്ന ഉദ്ദേശത്തോടെയാണ് അദ്ദേഹം വീഡിയോ പങ്കുവെച്ചത്. 

'വരൂ നമുക്ക് ദീപം തെളിയിക്കാം' എന്ന വരി ഉള്‍പ്പെടുന്ന കവിതയാണ് വാജ്പേയി ആലപിക്കുന്നത്. ഈ വരികൾ കുറിപ്പാക്കിയാണ് പ്രധാനമന്ത്രി വീഡിയോ പങ്കിട്ടത്.

ഒൻപത് മണി മുതല്‍ ഒമ്പത് മിനിറ്റ് നേരമാണ് ദീപം തെളിയിക്കേണ്ടത്. ചിരാതുകള്‍, മെഴുകുതിരികള്‍, ടോര്‍ച്ച്, മൊബൈൽ ഫ്ലാഷ് ലൈറ്റ് എന്നിവ തെളിയിക്കാമെന്നാണ് അദ്ദേഹത്തിന്റെ ആഹ്വാനം. ഒന്നിച്ച് തെളിയുന്ന വെളിച്ചത്തില്‍, ആ തേജസില്‍ എല്ലാവരുടേയും ഉള്ളില്‍ ഐക്യത്തിന്റെ വെളിച്ചം നിറയുമെന്നും ഒറ്റക്കാണ് എന്ന തോന്നല്‍ ദൂരീകരിക്കപ്പെടുമെന്നുമാണ് ദീപം തെളിയിക്കുന്നതിനെ കുറിച്ച് പ്രധാനമന്ത്രി പറഞ്ഞത്.