മുംബൈ : മഹാരാഷ്ട്രയിലും ദൃശ്യം മോഡല്‍ കൊലപാതകം. പങ്കജ് ദിലീപ് ഗിരാംകര്‍ എന്ന 32 കാരനെയാണ് കൊലപ്പെടുത്തിയത്. സംഭവത്തില്‍ റസ്റ്റോറന്റ് ഉടമ അടക്കം മൂന്നുപേര്‍ പൊലീസ് പിടിയിലായി. മഹാരാഷ്ട്രയിലെ നാഗ്പൂര്‍ സിറ്റിയിലാണ് സംഭവം നടന്നത്.
കാപ്‌സി ഏരിയയില്‍ ഭക്ഷണശാല നടത്തിവരുന്ന അമര്‍ സിങ് എന്ന ലല്ലു ജോഗേന്ദ്രസിങ് താക്കൂര്‍ (24), ഭക്ഷണശാലയിലെ ജോലിക്കാരായ മനോജ് എന്ന മുന്ന രാംപ്രകാശ് തിവാരി, രാകേഷ് ഡോങ്‌ഗ്രെ എന്നിവരാണ് അറസ്റ്റിലായത്. കഴിഞ്ഞ ഡിസംബര്‍ 28 നാണ് കേസിന് ആസ്പദമായ സംഭവം നടക്കുന്നത്.
ഹാല്‍ദിറാം കമ്പനിയില്‍ ഇലക്ട്രീഷ്യനായ പങ്കജ് ഗിരാംകറിന്റെ ഭാര്യയുമായി അമര്‍ സിങിന് വഴിവിട്ട ബന്ധം ഉണ്ടായിരുന്നു. ഇതറിഞ്ഞ ഗിരാംകര്‍, ഈ ബന്ധം അവസാനിപ്പിക്കുക ലക്ഷ്യമിട്ട് ഏതാനും നാള്‍മുമ്പ് വാദ്ര ജില്ലയിലേക്ക് താമസം മാറ്റിയിരുന്നു.
ഡിസംബര്‍ 28 ന് ഗിരാംകര്‍ മോട്ടോര്‍ ബൈക്കില്‍ അമര്‍ സിങിന്റെ ഭക്ഷണശാലയ്ക്ക് മുന്നിലെത്തി. ബന്ധം അവസാനിപ്പിക്കണമെന്ന് ആവശ്യപ്പെട്ടു. വാക്കുതര്‍ക്കം രൂക്ഷമായതോടെ, അമര്‍സിങ് ചുറ്റികയെടുത്ത് ഗിരാംകറിന്റെ തലയ്ക്ക് അടിക്കുകയായിരുന്നു. അടിയേറ്റ് വീണ ഗിരാംകര്‍ സംഭവസ്ഥലത്തു വെച്ചു തന്നെ മരിച്ചു.
ഇതോടെ ദാബ ( ഭക്ഷണശാല)യിലെ ജോലിക്കാരുടെ സഹായത്തോടെ തെളിവ് നശിപ്പിക്കാന്‍ അമര്‍സിങ് പദ്ധതിയിട്ടു. ഇതിന്റെ അടിസ്ഥാനത്തില്‍ കൂട്ടുപ്രതികളുടെ സഹായത്തോടെ ഗിരാംകറിന്റെ മൃതദേഹം സ്റ്റീല്‍ ഡ്രമ്മില്‍ ഒളിപ്പിച്ചു. തുടര്‍ന്ന് മറ്റൊരാളെ വിളിപ്പിച്ച് ഭക്ഷണശാലയ്ക്ക് പിന്നില്‍ 10 അടി താഴ്ചയില്‍ കുഴിയെടുപ്പിച്ചു.
ഈ കുഴിയില്‍ 50 കിലോ ഉപ്പ് വിതറിയശേഷം ഗിരാംകറിന്റെ മൃതദേഹവും ഇട്ട് കുഴി മൂടി. മോട്ടോര്‍ ബൈക്കും ഇതിന് മുകളിലിട്ട് കത്തിച്ചുകളഞ്ഞു. പിന്നീട് തെളിവ് നശിപ്പിക്കാനായി ഗിരാംകറിന്റെ മൊബൈല്‍ഫോണ്‍ രാജസ്ഥാനിലേക്ക് പോകുന്ന ട്രേക്കിന് മുകളില്‍ എറിഞ്ഞിട്ട് അന്വേഷണം വഴി തിരിച്ചുവിടാനും പ്രതികള്‍ ശ്രമിച്ചതായി അന്വേഷണത്തിന് മേല്‍നോട്ടം വഹിച്ച അഡീഷണല്‍ പൊലീസ് കമ്മീഷണര്‍ നിലേഷ് ഭര്‍നെ പറഞ്ഞു.
ഏതാനും ദിവസം കഴിഞ്ഞിട്ടും ഗിരാംകര്‍ വീട്ടിലേക്ക് തിരിച്ചുവരാതായതോടെയാണ്, ഇയാളെ കാണാനില്ലെന്ന് കാണിച്ച് ബന്ധുക്കള്‍ പൊലീസില്‍ പരാതി നല്‍കുന്നത്. തുടര്‍ന്ന് കേസന്വേഷണം ഏറ്റെടുത്ത ക്രൈംബ്രാഞ്ചിന് ഗിരാംകറിന്റെ തിരോധാനത്തില്‍ ഒരു തുമ്പും കിട്ടാതെ അന്വേഷണം വഴിമുട്ടി. ഇതിനിടെയാണ് ഗിരാംകര്‍ കാണാതാകുന്നതിന് മുമ്പ് അമര്‍സിങിന്റെ ഭക്ഷണശാലയില്‍ എത്തിയിരുന്നതായി വിവരം ലഭിച്ചത്.
തുടര്‍ന്ന് ഭക്ഷണശാല കേന്ദ്രീകരിച്ച് പൊലീസ് മഫ്ത്തിയില്‍ അന്വേഷണം ഊര്‍ജ്ജിതമാക്കി. ഇതേത്തുടര്‍ന്ന് ഗിരാംകറിന്റെ വസ്ത്രത്തിന്റെ ചില തെളിവുകള്‍ ഇവിടെ നിന്നും ലഭിച്ചത് നിര്‍ണായകമായി. തുടര്‍ന്ന് കസ്റ്റഡിയില്‍ എടുത്ത് നടത്തിയ ചോദ്യം ചെയ്യലില്‍ പ്രതികള്‍ കുറ്റം സമ്മതിച്ചതായി പൊലീസ് കമ്മീഷണര്‍ പറഞ്ഞു. പ്രതികള്‍ക്കൊപ്പം നടത്തിയ തെളിവെടുപ്പില്‍ ഗിരാംകറിന്റെ മൃതദേഹാവശിഷ്ടങ്ങളും ബൈക്കിന്റെ ഭാഗങ്ങളും കണ്ടെത്തി. മൃതദേഹം നശിപ്പിക്കാന്‍ കൂട്ടുനിന്ന ഭക്ഷണശാലയിലെ വെയിറ്ററായി ജോലി നോക്കുന്ന പ്രതിയെ കൂടി അറസ്റ്റ് ചെയ്യാനുണ്ടെന്നും, ഇയാള്‍ക്കായി തിരച്ചില്‍ ഊര്‍ജ്ജിതമാക്കിയതായും അസിസ്റ്റന്റ് കമ്മീഷണര്‍ നിലേഷ് ഭര്‍നെ അറിയിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
