ന്യൂഡല്‍ഹി: വ്യാജവാര്‍ത്തകള്‍ നല്‍കുന്ന മാധ്യമപ്രവര്‍ത്തകരുടെ അംഗീകാരം റദ്ദാക്കാനുളള കേന്ദ്രസര്‍ക്കാര്‍ നീക്കത്തിനെതിരെ കോണ്‍ഗ്രസ്. മാധ്യമപ്രവര്‍ത്തകരെ ദ്രോഹിക്കുന്ന ഈ നടപടി വഴി സര്‍ക്കാരിന് ഹിതകരമല്ലാത്ത വാര്‍ത്തകള്‍ പുറത്തുവരുന്നത് തടയുകയാണോ ലക്ഷ്യമെന്ന് കോണ്‍ഗ്രസ് നേതാവ് അഹമ്മദ് പട്ടേല്‍ പരോക്ഷമായി ചോദിച്ചു.
വാര്‍ത്തകള്‍ വ്യാജമാണെന്ന് ആരാണ് നിര്‍ണയിക്കുക. ഇത് റിപ്പോര്‍ട്ടര്‍മാരെ ദ്രോഹിക്കുന്നതിന് ദുരുപയോഗം ചെയ്യാനുളള സാധ്യതയുണ്ടെന്നും അഹമ്മദ് പട്ടേല്‍ ട്വിറ്ററില്‍ ആശങ്കപ്പെട്ടു. മറ്റുളളവരുടെ പരപ്രേരണയാല്‍ പരാതി നല്‍കുന്നതും മാധ്യമപ്രവര്‍ത്തകരുടെ അംഗീകാരം തല്കാലം തടഞ്ഞുവെയ്ക്കാന്‍ ഇടയാക്കില്ലേയെന്നും അഹമ്മദ് പട്ടേല്‍ ഉന്നയിച്ചു.
വിഷയത്തില്‍ കോണ്‍ഗ്രസിന് മറുപടിയുമായി കേന്ദ്ര വാര്‍ത്താവിതരണ മന്ത്രി സ്മൃതി ഇറാനി രംഗത്തുവന്നു. വാര്‍ത്ത വ്യാജമാണോയെന്ന് പരിശോധിക്കാന്‍ നിയോഗിക്കുന്ന പ്രസ് കൗണ്‍സില്‍ ഓഫ് ഇന്ത്യയും ന്യൂസ് ബ്രോഡ്കാസ്‌റ്റേഴ്‌സ് അസോസിയേഷനും നിയന്ത്രിക്കുന്നത് കേന്ദ്രസര്‍ക്കാരല്ലെന്ന്് ചൂണ്ടികാണിച്ചാണ് സ്മൃതി ഇറാനി തിരിച്ചടിച്ചത്.
മാധ്യമങ്ങളില്‍ വന്നത് വ്യാജവാര്‍ത്തയെന്ന് പരാതി ഉയര്‍ന്നാല്‍ മാധ്യമപ്രവര്‍ത്തകരുടെ അംഗീകാരം റദ്ദാക്കാനുളള പുതിയ നിര്‍ദേശവുമായാണ് കേന്ദ്രസര്‍ക്കാര്‍ മുന്നോട്ടുവന്നിരിക്കുന്നത്.ഇതുസംബന്ധിച്ച മാര്‍ഗനിര്‍ദേശങ്ങളില്‍ ഭേദഗതി വരുത്തിയാണ് നടപടി കര്‍ശനമാക്കാന്‍ കേന്ദ്രസര്‍ക്കാര്‍ തയ്യാറെടുക്കുന്നത്.
വ്യാജവാര്‍ത്ത സംബന്ധിച്ച പരാതി ലഭിച്ചാലുടന്‍ പ്രസ് കൗണ്‍സില്‍ ഓഫ് ഇന്ത്യ അല്ലെങ്കില്‍ ന്യൂസ് ബ്രോഡ്കാസ്‌റ്റേഴ്‌സ് അസോസിയേഷന്‍ എന്നിവര്‍ക്ക് കൈമാറി കേന്ദ്രസര്‍ക്കാര്‍ ഉപദേശം തേടും. 15 ദിവസത്തിനുളളില്‍ ഇതുസംബന്ധിച്ച റിപ്പോര്‍ട്ട് സമിതികള്‍ സര്‍ക്കാരിന് തിരികെ നല്‍കണം. സമിതികള്‍ റിപ്പോര്‍ട്ടുകള്‍ നല്‍കുന്നതുവരെ ആരോപിതരായ മാധ്യമപ്രവര്‍ത്തകരുടെ അംഗീകാരം മരവിപ്പിക്കും.
സമിതികള്‍ നല്‍കിയ റിപ്പോര്‍ട്ടില്‍ വ്യാജവാര്‍ത്ത പ്രചരിപ്പിച്ചതായി തെളിഞ്ഞാല്‍ ആറുമാസത്തേക്ക് അംഗീകാരം റദ്ദുചെയ്യും. ഇതേ മാധ്യമപ്രവര്‍ത്തകര്‍ക്കെതിരെ പിന്നിടൊരിക്കല്‍ പരാതി ലഭിച്ചാല്‍ ഒരു വര്‍ഷത്തേക്കായിരിക്കും അംഗീകാരം റദ്ദാക്കുക. മൂന്നാമതൊരു തവണകൂടി വ്യാജവാര്‍ത്ത പ്രചരിപ്പിച്ചാല്‍ സ്ഥിരമായി അംഗീകാരം നഷ്ടപ്പെടും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
