ശ്രീന​ഗറിൽ തീവ്രവാദി ആക്രമണം; രണ്ട് ബിഎസ്എഫ് ജവാൻമാർക്ക് വീരമൃത്യു

ശ്രീനഗർ: ജമ്മു കശ്മീരിലെ ശ്രീനഗറിലുണ്ടായ തീവ്രവാദി അക്രമണത്തിൽ രണ്ട് ബിഎസ്എഫ് ജവാൻമാർക്ക് വീരമൃത്യു. സൗര മേഖലയിൽ പിക്കറ്റ് ഡ്യൂട്ടിയിലുള്ള ജവാൻമാരാണ് മരിച്ചതെന്ന് പൊലീസ് അറിയിച്ചു. 

കടയില്‍ സാധനങ്ങൾ വാങ്ങാനെത്തിയ ജവാന്മാർക്ക് നേരെ ബൈക്കുകളിലെത്തിയ തീവ്രവാദികള്‍ വെടിയുതിർക്കുകയായിരുന്നു. സമീപ പ്രദേശങ്ങളിൽ ഇവരെ കണ്ടെത്താനുള്ള തിരച്ചിൽ സൈന്യം തുടരുകയാണ്. അക്രമണത്തിന് ശേഷം സംഭവ സ്ഥലത്തു നിന്ന് ജവാൻമാരുടെ തോക്കുകൾ കൈക്കലാക്കിയാണ് തീവ്രവാദികൾ രക്ഷപ്പെട്ടത്.

കഴിഞ്ഞ ആഴ്ചയുണ്ടായ തീവ്രവാദി ആക്രമണത്തിൽ ഒരു കേണലടക്കം ഏഴോളം ജവാൻമാർ കൊല്ലപ്പെട്ടിരുന്നു. ഇതിനു തിരിച്ചടിയായി ഹിസ്ബുൾ മുജാഹീദീൻ തലവൻ റിയാസ്ശ്രീ നായ്കൂ അടക്കമുള്ളവരെ സൈന്യം വധിച്ചിരുന്നു.