സ്ഥലം മക്കള്‍ക്ക് വീതിച്ച് നല്‍കി, അച്ഛനോട് വീട് വിട്ടുപോകാന്‍ നിരന്തരം ആവശ്യം; പ്രകോപിതനായി ഭാര്യയെയും മകനെയും അരിവാളിന് വെട്ടി

കോയമ്പത്തൂര്‍: വീട് വിട്ടുപോകാനുളള ആവശ്യത്തില്‍ പ്രകോപിതനായ 67കാരന്‍ ഭാര്യയെയും മകനെയും കൊല്ലാന്‍ ശ്രമിച്ചു. അരിവാള്‍ കൊണ്ടുളള ആക്രമണത്തില്‍ 21 കാരനായ മകന് ഗുരുതരമായി പരിക്കേറ്റു. അമ്മയും മകനും ആശുപത്രിയില്‍ ചികിത്സയിലാണ്.

തിരുപ്പൂര്‍ നഗരത്തില്‍ ശനിയാഴ്ചയാണ് സംഭവം. 67കാരനായ നിര്‍മ്മാണ തൊഴിലാളി ഭാര്യയ്ക്കും മകനും ഒപ്പമാണ് താമസിക്കുന്നത്. വീട് വിട്ടുപോകാനുളള 48കാരിയായ ഭാര്യയുടെയും മകന്റെയും നിരന്തരമായ ആവശ്യമാണ് പ്രകോപനത്തിന കാരണമെന്ന് പൊലീസ് പറയുന്നു.

അടുത്തിടെ സ്വദേശമായ തിരുവണാമലയിലെ 1.5 ഏക്കര്‍ വരുന്ന സ്വന്തം സ്ഥലം വിജയരാജ് രണ്ടു മക്കള്‍ക്കായി വീതിച്ചുനല്‍കിയിരുന്നു. തുടര്‍ന്നാണ് തിരുപ്പൂരിലെ വാടക വീട്ടില്‍ നിന്ന് ഇറങ്ങിപ്പോകാന്‍ ഭാര്യയും ഇളയമകനും നിരന്തരമായി ആവശ്യപ്പെട്ടു തുടങ്ങിയതെന്ന് പൊലീസ് പറയുന്നു.

ശനിയാഴ്ച പുലര്‍ച്ചെ രണ്ടുമണിക്ക് വീണ്ടും ഭാര്യയും ഇളയമകനും ഈ ആവശ്യം ഉന്നയിച്ചു. തര്‍ക്കത്തിനൊടുവില്‍ കുപിതനായ 67കാരന്‍ അരിവാള്‍ ഉപയോഗിച്ച് ഭാര്യയെയും മകനെയും വെട്ടുകയായിരുന്നു. ഉടനെ തന്നെ തിരുപ്പൂര്‍ മെഡിക്കല്‍ കോളജില്‍ പ്രവേശിപ്പിച്ചു.