തിരുവനന്തപുരം: ഏഴ് ഗതാഗത നിയമ ലംഘനങ്ങള്‍ക്ക് മോട്ടര്‍ വാഹന നിയമ ഭേദഗതി അനുസരിച്ചുള്ള പിഴ കുറയ്ക്കാന്‍ മുഖ്യമന്ത്രി പിണറായി വിജയന്റെ അധ്യക്ഷതയില്‍ ഉന്നതതല യോഗം ധാരണയിലെത്തി. എത്ര കുറയ്ക്കണമെന്നു ഗതാഗത, നിയമ വകുപ്പുകള്‍ ചര്‍ച്ച ചെയ്തു ധാരണയിലെത്തും.
ഹെല്‍മറ്റും സീറ്റ്‌ബെല്‍റ്റും ധരിക്കാത്തതിന് ഉള്‍പ്പെടെ നിശ്ചിത തുക വ്യക്തമാക്കിയ ലംഘനങ്ങളുടെ പിഴ പകുതിയാക്കുന്നതില്‍ തീരുമാനമായില്ല. ഇതിനായി വീണ്ടും കേന്ദ്രത്തെ സമീപിക്കും. 1000 രൂപ മുതല്‍ 10,000 വരെ പിഴ വരുന്ന ലംഘനങ്ങള്‍ക്ക് അതിലും കുറഞ്ഞ പിഴ പറ്റുമോയെന്നു നിയമ സെക്രട്ടറി വീണ്ടും പരിശോധിക്കും. തുടര്‍ന്നു നിയമ ഭേദഗതി സംബന്ധിച്ചു പുനര്‍ വിജ്ഞാപനം ഇറക്കും. അതിനു ശേഷമേ മോട്ടര്‍വാഹന വകുപ്പും പൊലീസും പിഴ ഈടാക്കുകയുള്ളൂ. അതുവരെയുള്ള കേസുകള്‍ കോടതിക്കു കൈമാറും.
കേന്ദ്ര ഭേദഗതി പ്രകാരം ഇത്ര വരെ പിഴയെന്നു പറയുന്ന ഏഴിനങ്ങളുടെയാണ് തുക കുറയ്ക്കുക. എത്ര വരെയെന്നു ഗതാഗത സെക്രട്ടറിയും കമ്മിഷണറും തീരുമാനിച്ചു നിയമ വകുപ്പിനു കൈമാറും. നിയമ സെക്രട്ടറി ആവശ്യമെങ്കില്‍ മാറ്റം വരുത്തി നിയമ മന്ത്രിയുടെ അഭിപ്രായം കൂടി രേഖപ്പെടുത്തി അന്തിമ തീരുമാനമെടുക്കും.
നിശ്ചിത തുക തീരുമാനിച്ചിട്ടുള്ള ലംഘനങ്ങളുടെ പിഴ 1000 രൂപയില്‍ നിന്ന് 500 ആക്കി കുറയ്ക്കാമെന്നു നിയമ സെക്രട്ടറി യോഗത്തെ അറിയിച്ചു. ജസ്റ്റിസ് അരിജിത് പസായത്തിന്റെ 2005 ലെ സുപ്രീംകോടതി വിധി വച്ചാണ് ഇക്കാര്യം വ്യക്തമാക്കിയത്.എന്നാല്‍ പാര്‍ലമെന്റ്് പാസാക്കി രാഷ്ട്രപതി അംഗീകരിച്ച പിഴ സംസ്ഥാനം കുറയ്ക്കുന്നതു നിയമപരമായി നിലനില്‍ക്കില്ലെന്ന അഭിപ്രായം വന്നതോടെ വീണ്ടും കേന്ദ്രത്തിന്റെ അഭിപ്രായം തേടാന്‍ തീരുമാനിച്ചു.
പിഴ കുറയ്ക്കാന്‍ സംസ്ഥാനത്തിന് അധികാരമുണ്ടെന്നു കേന്ദ്രമന്ത്രി നിതിന്‍ ഗഡ്കരി വ്യക്തമാക്കിയെങ്കിലും ഉത്തരവിറക്കിയിട്ടില്ല. വ്യക്തത ആവശ്യപ്പെട്ടു സംസ്ഥാനം കത്തയച്ചെങ്കിലും മറുപടി ലഭിച്ചില്ല. യോഗത്തില്‍ മന്ത്രിമാരായ എ.കെ. ബാലന്‍, എ.കെ. ശശീന്ദ്രന്‍, ചീഫ് സെക്രട്ടറി ടോം ജോസ്, ഗതാഗത പ്രിന്‍സിപ്പല്‍ സെക്രട്ടറി കെ.ആര്‍.ജ്യോതിലാല്‍, ഗതാഗത കമ്മിഷണര്‍ ആര്‍.ശ്രീലേഖ, അഡീഷനല്‍ ഡിജിപിമാരായ ഷേക്ക് ദര്‍ബേഷ് സാഹിബ്, മനോജ് ഏബ്രഹാം തുടങ്ങിയവര്‍ പങ്കെടുത്തു.
കുറയ്ക്കുന്ന പിഴകള്‍
പൊതു വിഭാഗത്തില്‍ പെടുന്നവ (സെക്ഷന്‍ 177): നിയമത്തില്‍ ഒരിടത്തും പറയാത്ത പിഴകള്‍; വാഹനത്തിന്റെ പുക സര്‍ട്ടിഫിക്കറ്റ്് ഇല്ലാതിരിക്കുക, ഇന്‍ഡിക്കേറ്റര്‍ പ്രവര്‍ത്തിക്കാതിരിക്കുക ഉള്‍പ്പെടെയുള്ള നിയമ ലംഘനം കേന്ദ്ര നിയമത്തില്‍ പറയുന്നത് 500 രൂപ വരെ
അധികൃതരുടെ ഉത്തരവ് പാലിക്കാതിരിക്കല്‍ 179 (1) – 2000 രൂപ വരെ
അധികൃതര്‍ ആവശ്യപ്പെടുന്ന വിവരങ്ങള്‍ സമയത്തു നല്‍കാതിരിക്കല്‍ 179 (2) 2000 രൂപ വരെ
ലൈസന്‍സ് ഇല്ലാതെ ബസില്‍ കണ്ടക്ടര്‍ ജോലി ചെയ്താല്‍ 10,000 രൂപ വരെ
ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിക്കുന്നത്. നിലവില്‍ 1000 മുതല്‍ 5,000 രൂപ വരെ പിഴ . ഇതു മിനിമത്തിലും കുറയ്ക്കാന്‍ സാധിക്കുമോയെന്നു പരിശോധിക്കും
മാനസികമായും ശാരീരികമായും മോശം അവസ്ഥയില്‍ വാഹനം ഓടിക്കുന്നത് (സെക്ഷന്‍ 186) 1000 രൂപ വരെ
വായു–ശബ്ദ മലിനീകരണം ഉണ്ടാക്കുന്ന വാഹനം ഉപയോഗിച്ചാല്‍ 190 (2) 10,000 രൂപ വരെ പിഴ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
