തിരുവനന്തപുരം കോർപറേഷൻ; സിപിഎം നേതാവ് എ സമ്പത്തിന്റെ സഹോദരൻ ബിജെപി സ്ഥാനാർത്ഥി

തിരുവനന്തപുരം: സിപിഎം നേതാവ് എ സമ്പത്തിന്റെ സഹോദരനും ഹിന്ദു ഐക്യവേദി ജില്ലാ പ്രസിഡന്റുമായ എ കസ്തൂരി ബിജെപി സ്ഥാനാർത്ഥി. തിരുവനന്തപുരം കോർപറേഷൻ തെരഞ്ഞെടുപ്പിനുള്ള രണ്ടാം ഘട്ട ബിജെപി പട്ടിക പുറത്തിറങ്ങിയപ്പോഴാണ് കസ്തൂരിയുടെ പേരും ഉൾപ്പെട്ടത്.

സിപിഎം നേതാവായിരുന്ന കെ അനി​രുദ്ധന്റെ മകനായ കസ്തൂരി തൈക്കാട് വാർഡിലാണ് ജനവിധി തേടുന്നത്. പാർട്ടി ആസ്ഥാനത്തു നടന്ന സ്ഥാനാർത്ഥി പ്രഖ്യാപനത്തിൽ സിപിഎം നേതാക്കളുമായുള്ള ബന്ധം പരാമർശിച്ചാണ് കസ്തൂരിയെ ജില്ലാ പ്രസിഡന്റ് കരമന ജയൻ സ്വാ​ഗതം ചെയ്തത്.

കുമ്മനം രാജശേഖരൻ കസ്തൂരിയെ ഷാൾ അണിയിച്ച് സ്വീകരിച്ചു. എൻഡിഎഫിന്റെ സിറ്റിങ് വാർഡായ തൈക്കാട് ജി വേണു​ഗോപാലാണ് ഇടതു സ്ഥാനാർത്ഥി. സിഎംപിയുടെ എംആർ മനോജ് ആണ് യുഡിഎഫ് സ്ഥാനാർത്ഥി.

രണ്ടാം ഘട്ടത്തിൽ 31 പേരുടെ പട്ടികയാണ് ബിജെപി പുറത്തിറക്കിയത്. മൂന്ന് സീറ്റുകളിൽ ബിഡിജെഎസ് സ്ഥാനാർത്ഥികളാണ്.