ആലപ്പുഴ: പൊലീസ് വാഹനത്തില്‍ യുവതിക്ക് സുഖപ്രസവം. ആലപ്പുഴ പൊലീസ് കണ്‍ട്രോള്‍ റൂം വാഹനത്തില്‍ ആശുപത്രിയിലേക്ക് കൊണ്ടുപോകുന്നതിനിടെയായിരുന്നു യുവതിയുടെ പ്രസവം. മണ്ണഞ്ചേരി സ്വദേശിനി ആതിരയും കുഞ്ഞും സുഖമായിരിക്കുന്നതായി ആശുപത്രി അധികൃതര്‍ അറിയിച്ചു.
മണ്ണഞ്ചേരി തമ്പകച്ചുവട് നിന്നും പിതാവിന്റെ ഓട്ടോറിക്ഷയിലാണ് യുവതിയെ ആലപ്പുഴയിലെ സ്ത്രീകളുടെയും കുട്ടികളുടെയും ആശുപത്രിയിലേക്ക് കൊണ്ടുവന്നത്. ജില്ലാ കോടതിക്ക് മുന്നിലെത്തിയപ്പോള്‍ യുവതിക്ക് പ്രസവവേദന ശക്തമായി. അവിടെയുണ്ടായിരുന്ന പോലീസ് ഉദ്യോഗസ്ഥരെ വിവരം അറിയിച്ചതോടെ ആതിരയെ പോലീസ് വാഹനത്തില്‍ ആശുപത്രിയിലേക്ക് കൊണ്ടുപോയി. ആശുപത്രിയില്‍ എത്തുന്നതിനിടെ യുവതി പ്രസവിച്ചിരുന്നു.
കണ്‍ട്രോള്‍ റൂമിലെ എഎസ്‌ഐ ബൈജു, സിവില്‍ പോലീസ് ഓഫീസര്‍മാരായ ബി പ്രസാദ്, വിഷ്ണുരാജ് എന്നിവരാണ് യുവതിയെ ആശുപത്രിയിലേക്ക് കൊണ്ടുപോയത്. യുവതിയെ ആശുപത്രിയിലെത്തിക്കാന്‍ അടിയന്തരഘട്ടത്തില്‍ ഇടപെട്ട പൊലീസ് ഉദ്യോഗസ്ഥരെ സമൂഹമാധ്യമങ്ങളിലൂടെയും അല്ലാതെയും നിരവധി പേര്‍ അഭിനന്ദിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
