കണ്ണൂര്: മുഖത്ത് പരിക്കേറ്റ് ചികിത്സക്കെത്തിയ ഒന്നരവയസുകാരന് അനസ്തേഷ്യ നല്കിയതില് വീഴ്ച സംഭവിച്ചതില് കേസെടുത്ത് പൊലീസ്. ബേബി മെമ്മോറിയല് ആശുപത്രിയിലെ അനസ്തേഷ്യ ഡോക്ടര് ഡോ. അഞ്ജലി പൊതുവാളിനെതിരെയാണ് പയ്യന്നൂര് പൊലീസ് കേസെടുത്തത്. ഡോക്ടറുടെ അശ്രദ്ധ കാരണം കുട്ടിക്ക് ബ്രെയിന് ഡാമേജ് സംഭവിച്ചെന്നാണ് എഫ്ഐആര്.
കഴിഞ്ഞ ദിവസമാണ് കണ്ണൂര് എരമം സ്വദേശികളായ ദമ്പതികളുടെ കുഞ്ഞ് കളിക്കുന്നതിനിടെ വീണ് പരിക്കേറ്റത്. ചുണ്ടിലും മുഖത്തുമായിരുന്നു പരിക്ക്. ആദ്യം സമീപത്തെ പ്രാഥമിക ആരോഗ്യ കേന്ദ്രത്തില് എത്തിച്ച് പ്രഥമശുശ്രൂഷ നല്കിയ ശേഷം പയ്യന്നൂര് ബേബി മെമ്മോറിയല് ആശുപത്രിയിലെത്തിച്ചു. സ്റ്റിച്ച് ഇടാന് വേണ്ടിയാണ് ഡോക്ടര് കുഞ്ഞിന് അനസ്തേഷ്യ നല്കിയത്. ഇതോടെ കുഞ്ഞ് ബോധരഹിതനായി. തുടര്ന്ന് വിദഗ്ധ ചികിത്സക്ക് കണ്ണൂരിലെ ബേബി മെമ്മോറിയല് ആശുപത്രിയിലേക്ക് മാറ്റി.
അനസ്തേഷ്യ നല്കിയപ്പോള് ഹൃദയസ്തംഭനം ഉണ്ടായെന്നാണ് ആശുപത്രിയുടെ വിശദീകരണം. അടിയന്തിര ഘട്ടങ്ങളില് അല്ലാതെ രണ്ട് വയസിന് താഴെയുള്ള കുട്ടികള്ക്ക് അനസ്തേഷ്യ നല്കാറില്ലെന്നാണ് വിദഗ്ധര് പറയുന്നത്. ഇതോടെ ചികിത്സാപിഴവ് ആരോപിച്ച് ബന്ധുക്കള് പൊലീസില് പരാതി നല്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
