കൊച്ചി: എറണാകുളം നോര്ത്ത് പൊലീസ് സ്റ്റേഷനില് യുവതിക്ക് ക്രൂരമര്ദനം. പൊതുസ്ഥലത്തെ പൊലീസ് മര്ദനം ചിത്രീകരിച്ചതിന് കസ്റ്റഡിയിലെടുത്ത യുവാവിനെ തിരക്കി എത്തിയ ഗര്ഭിണിക്കാണ് സിഐ പ്രതാപ ചന്ദ്രന്റെ ക്രൂരമര്ദനമേറ്റത്. 2024 ജൂണ് 20നു നടന്ന മര്ദനത്തിന്റെ വിഡിയോ ദൃശ്യങ്ങള് പുറത്തുവന്നു. കൊച്ചി സ്വദേശി ഷൈമോള്ക്കാണ് പൊലീസിന്റെ അടിയേറ്റത്. ഹൈക്കോടതിയുടെ ഉത്തരവ് പ്രകാരമാണ് ഇതിന്റെ സിസിടിവി ദൃശ്യങ്ങള് പരാതിക്കാരിക്ക് പൊലീസ് കൈമാറിയത്. സംഭവം വാര്ത്തയായതോടെ മുഖ്യമന്ത്രി എഡിജിപിയോട് റിപ്പോര്ട്ട്് തേടി. സിഐക്കെതിരെ കര്ശന നടപടിയെടുക്കാന് നിര്ദേശം നല്കിയതായാണ് വിവരം.
യുവതിയുടെ നെഞ്ചില് പിടിച്ചുതള്ളുന്നതും മുഖത്തടിക്കുന്നതും വീഡിയോ ദൃശ്യങ്ങളില് വ്യക്തമാണ്. മഫ്തിയില് പൊലീസ് ഉദ്യോഗസ്ഥര് പൊതു ഇടത്തുവച്ച് രണ്ടുപേരെ മര്ദിക്കുന്നത് യുവാവ് ഫോണില് പകര്ത്തിയിരുന്നു. തുടര്ന്ന് പൊലീസ് ഇയാളെ പിടികൂടി എറണാകുളം നോര്ത്ത് പൊലീസ് സ്റ്റേഷനിലെത്തിച്ചു. സംഭവമറിഞ്ഞു യുവാവിനെ അന്വേഷിച്ച് സ്റ്റേഷനിലെത്തിയ ഭാര്യയെയാണ് എസ്എച്ച്ഒ പ്രതാപചന്ദ്രന് മര്ദിച്ചത്. യൂണിഫോം ധരിക്കാത്ത പൊലീസ് ഉദ്യോഗസ്ഥരാണ് സ്റ്റേഷനിലും അക്രമം നടത്തിയത്. കൂടുതല് അക്രമത്തിനു മുതിര്ന്ന എസ്എച്ച്ഒയെ മറ്റ് ഉദ്യോഗസ്ഥര് പിടിച്ചുനിര്ത്തുകയായിരുന്നു.
മര്ദനത്തിന്റെ വിഡിയോ ദൃശ്യങ്ങള്ക്കായി ഒരു വര്ഷത്തോളം യുവതിക്ക് പോരാടേണ്ടി വന്നു. പരാതി നല്കിയപ്പോള് യുവതി എസ്എച്ച്ഒയെ മര്ദിച്ചു എന്നാണ് പൊലീസ് കഥ മെനഞ്ഞത്. തുടര്ന്നു കോടതിയെ സമീപിച്ചപ്പോഴാണ് സിസിടിവി ദൃശ്യങ്ങള് ലഭിച്ചത്. പൊലീസ് മര്ദിക്കുന്നതിന്റെ വീഡിയോ സാമൂഹിക മാധ്യമങ്ങളില് വ്യാപകമായി പ്രചരിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
