തുടർച്ചയായ മഴ; കുട്ടനാട്ടിൽ വ്യാപക മട വീഴ്ച

ആലപ്പുഴ: തുടർച്ചയായി പെയ്ത ശക്തമായ മഴയിൽ കുട്ടനാട്ടിലെ വിവിധ പാടശേഖരങ്ങളിൽ വ്യാപക മട വീഴ്ച.  മാണിക്യമം​ഗലം പാടശേഖരത്തിൽ മടവീഴ്ച ഉണ്ടായതോടെ എസി റോഡിലും പരിസര പ്രദേശങ്ങളിലും വെള്ളം കയറി. 

കാവാലം കൃഷി ഭവന് കീഴിൽ വരുന്നതാണ് മാണിക്യമം​ഗലം പാടശേഖരം. ഇല്ലിമുറ തെക്കെ തൊള്ളായിരം പാടശേഖരത്തിലും മട വീണു. ചമ്പക്കുളം കൃഷി ഭവന് കീഴിലുള്ളതാണ് ഇത്. 

ഇവിടെ കൊയ്ത്തു കഴിഞ്ഞതിനാൽ കൃഷി നാശമില്ല. കനത്ത മഴയെ തുടർന്ന് ചമ്പക്കുളം, കൈനകരി, പുളിങ്കുന്ന്, നെടുമുടി പഞ്ചായത്തുകളിൽ വെള്ളക്കെട്ട് രൂക്ഷമാണ്. കൊയ്ത്ത് കഴിഞ്ഞ പാടത്ത് വെള്ളം കയറ്റിയിട്ടതും മഴവെള്ളവും കിഴക്കൻ വെള്ളത്തിന്റെ വരവുമാണ് ഇവിടെ വെള്ളക്കെട്ട് രൂക്ഷമാവാൻ കാരണം.