കണ്ണൂര്: സിപിഎം മുന് കണ്ണൂര് ജില്ലാ സെക്രട്ടേറിയറ്റ് അംഗവും തളിപ്പറമ്പ് നിയോജക മണ്ഡലത്തില് കോണ്ഗ്രസിന്റെ പിന്തുണയോടെ മത്സരിക്കുന്ന സ്വതന്ത്ര സ്ഥാനാര്ഥിയുമായ ടികെ ഗോവിന്ദന്റെ ഭാര്യ കെപി രമണിയെ സിപിഎമ്മില് നിന്നും പുറത്താക്കി. യുഡിഎഫ് കണ്വെന്ഷനില് പങ്കെടുത്തതിന് പിന്നാലെയാണ് രമണിയെ പാര്ട്ടിയില് നിന്ന് പുറത്താക്കിയതെന്ന് സിപിഎം ജില്ലാ നേതൃത്വം അറിയിച്ചു. സിപിഎം ശ്രീകണ്ഠാപുരം ഏരിയാ കമ്മിറ്റി അംഗമായിരുന്നു കെപി രമണി.
ഇന്നലെ ടികെ ഗോവിന്ദന്റെ തെരഞ്ഞെടുപ്പ് കണ്വെന്ഷനില് ഭാര്യ കെപി രമണി പങ്കെടുത്തിരുന്നു. തളിപ്പറമ്പ് ടൗണ് സ്ക്വയറില് നടന്ന യുഡിഎഫ് കണ്വെന്ഷനില് ഡിസിസി പ്രസിഡന്റ് അഡ്വ: മാര്ട്ടിന് ജോര്ജ് രമണിയെ മൂവര്ണ ഷാള് സ്വീകരിച്ചു. ഭര്ത്താവിന് പിന്തുണ അറിയിച്ചു കൊണ്ടാണ് തളിപ്പറമ്പ് ടൗണ് സ്വകയറില് നടന്ന കണ്വെന്ഷനില് ഭാര്യ കെ പി രമണി എത്തിയത്. മുന് ബ്ലോക്ക് പഞ്ചായത്ത് പ്രസിഡന്റും മലപ്പട്ടം പഞ്ചായത്ത് പ്രസിഡന്റുമായിരുന്നു കെപി രമണി.
നേരത്തെ ടികെ ഗോവിന്ദന്റെ കുടുംബം പോലും അദ്ദേഹത്തോടൊപ്പമില്ലെന്ന് സിപിഎം സംസ്ഥാന സെക്രട്ടേറിയറ്റ് അംഗം എംവി ജയരാജന് വിമര്ശിച്ചിരുന്നു. എന്നാല് തന്റെ ഭര്ത്താവിനൊപ്പം കുടുംബവുമില്ലെന്ന വിമര്ശനം ഉയര്ന്നതിനെ തുടര്ന്നാണ് താന് യുഡി എഫ് വേദിയിലെത്തിയത് കെപി രമണി മാധ്യങ്ങളോട് പറഞ്ഞു. അത്തരം പ്രചാരണങ്ങള് തന്നെ വേദനിപ്പിച്ചു. ഗോവിന്ദന് മാസ്റ്റര് ഒറ്റപ്പെടാന് പാടില്ല. പാര്ട്ടി നടപടിയുണ്ടാകുമെന്ന് അറിയാം. അംഗത്വമില്ലെങ്കിലും അനുഭാവിയായി പാര്ട്ടിയില് തുടരുമെന്നും കെപി രമണി പറഞ്ഞു. ഗോവിന്ദന് മാഷ് പറയുന്ന കാര്യങ്ങള് ശരിയാണെന്ന് വിശ്വസിക്കുന്ന ധാരാളം പേര് പാര്ട്ടിക്കുള്ളിലും പുറത്തുമുണ്ട്. ആ തോന്നല് തനിക്കുമുണ്ടെന്നും കെപി രമണി പറഞ്ഞിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
