കണ്ണൂര്: സാമ്പത്തിക ക്രമക്കേട് ഉള്പ്പെടെയുള്ള ആരോപണങ്ങളുമായി സിപിഎം നേതാക്കള്ക്കെതിരെ മാധ്യമങ്ങളോട് പ്രതികരിച്ച കണ്ണൂര് ജില്ലാ കമ്മിറ്റി അംഗം വി കുഞ്ഞികൃഷ്ണനെ തള്ളി നേതൃത്വം. കുഞ്ഞുകൃഷ്ണന്റെ ആക്ഷേപങ്ങള് തികച്ചും വാസ്തവ വിരുദ്ധമാണെന്ന് സിപിഎം കണ്ണൂര് ജില്ലാ സെക്രട്ടറി കെ കെ രാഗേഷ് പ്രതികരിച്ചു. തെരഞ്ഞെടുപ്പ് അടുക്കുന്ന ഘട്ടത്തില് മാധ്യമങ്ങളുടെയും, രാഷ്ട്രീയ ശത്രുക്കളുടെയും കോടാലി കൈയ്യായി മാറുന്നതരത്തിലാണ് കുഞ്ഞികൃഷ്ണന്റെ പ്രവര്ത്തനം. പാര്ട്ടിയെ ബഹുജന മധ്യത്തില് ഇകഴ്ത്തിക്കാട്ടുന്ന കുഞ്ഞികൃഷ്ണന്റെ ഈ നടപടി പാര്ട്ടിക്ക് ഒരു തരത്തിലും അംഗീകരിക്കാന് കഴിയാത്തതാണെന്നും കെ കെ രാകേഷ് പത്രക്കുറിപ്പില് അറിയിച്ചു.
വര്ഷങ്ങള്ക്ക് മുന്പ് പാര്ട്ടിയില് ഉയര്ന്നുവന്നതും, പാര്ട്ടി ചര്ച്ച ചെയ്ത് തീരുമാനം കൈക്കൊണ്ടതുമായ വിഷങ്ങളാണ് വി കുഞ്ഞുക്കണ്ണന് മാധ്യമങ്ങളിലൂടെ പ്രതികരിച്ചത്. സമയ ബന്ധിതമായി വരവ്-ചിലവ് കണക്ക് അവതരിപ്പിക്കുന്നതിലുള്ള വീഴ്ച അല്ലാതെ വ്യക്തിപരമായി ആരും ധനാപഹരണം നടത്തിയിട്ടില്ലെന്ന കമ്മീഷന് റിപ്പോര്ട്ട് ജില്ലാ കമ്മിറ്റി ചര്ച്ച ചെയ്ത് അംഗീകരിച്ചതുമാണ്. 2021 ല് ഉയര്ന്നുവന്ന ആക്ഷേപത്തെ തുടര്ന്ന് പാര്ട്ടി ജില്ലാ കമ്മിറ്റി നിശ്ചയിച്ച കമ്മീഷന് പരിശോധന നടത്തുകയും, കമ്മീഷന്റെ റിപ്പോര്ട്ട് പാര്ട്ടി ജില്ലാ കമ്മിറ്റി ചര്ച്ച ചെയ്ത് ചില സംഘടന നടപടികള് പാര്ട്ടി സ്വീകരിച്ചതുമാണ്. പാര്ട്ടി ജില്ലാ കമ്മിറ്റിയും, പാര്ട്ടി പയ്യന്നൂര് ഏരിയ കമ്മിറ്റിയും നിശ്ചയിച്ച കമ്മീഷനുകളാണ് വിവിധ ആക്ഷേപങ്ങളെക്കുറിച്ച് അതത് ഘട്ടത്തില് അന്വേഷിച്ച് അതത് കമ്മിറ്റികള് ചര്ച്ച ചെയ്ത് തീരുമാനങ്ങള് കൈക്കൊണ്ടത്. ഈ ചര്ച്ചയിലും, തീരുമാനങ്ങളിലും വി. കുഞ്ഞികൃഷ്ണനും പങ്കാളിയായിരുന്നു.
അതിന് ശേഷം പാര്ട്ടിയുടെ വിവിധ ഘടക സമ്മേളനങ്ങളില് വി. കുഞ്ഞികൃഷ്ണന് പുതിയ ചില ആരോപണങ്ങള് ഉന്നയിക്കുകയുണ്ടായി. ഈ ആരോപണങ്ങള് മാധ്യമങ്ങളിലും മറ്റും വാര്ത്തയായി വരുന്ന നിലയുമുണ്ടായി. ഉന്നയിച്ച കാര്യങ്ങള് പാര്ട്ടി ജില്ലാ കമ്മിറ്റി നിശ്ചയിച്ച കമ്മീഷന് അന്വേഷിക്കുകയും അന്വേഷണ റിപ്പോര്ട്ട് ജില്ലാ കമ്മിറ്റി ചര്ച്ച ചെയ്യുകയും ഉണ്ടായി. വിഭാഗീയ ലക്ഷ്യങ്ങളോടെ തെറ്റായ ആരോപണങ്ങള് ബോധപൂര്വ്വം ഉന്നയിക്കുകയായിരുന്നുവെന്ന് കണ്ടെത്തിയതിനെ തുടര്ന്ന് വി. കുഞ്ഞികൃഷ്ണനെതിരെ അച്ചടക്ക നടപടി സ്വീകരിച്ചതുമാണ്. എട്ടു മാസങ്ങള്ക്ക് മുമ്പ് നടന്ന ജില്ലാ കമ്മിറ്റി യോഗത്തില് എനിക്ക് തെറ്റുപറ്റിയെന്ന് വി. കുഞ്ഞികൃഷ്ണന് തുറന്ന് പറഞ്ഞിട്ടുണ്ടെന്നും കെ കെ രാകേഷ് പറയുന്നു.
പാര്ട്ടിയില് അതത് കാലഘട്ടത്തില് ഉയര്ന്നുവരുന്ന ആക്ഷേപങ്ങളെല്ലാം തന്നെ കമ്മ്യൂണിസ്റ്റ് സംഘടന രീതി അനുസരിച്ച് ചര്ച്ച ചെയ്യുകയും ആവശ്യമായ സംഘടന നടപടികള് സ്വീകരിക്കുകയും ചെയ്തിട്ടുണ്ട്. ഇത്തരമൊരു സാഹചര്യത്തില് പാര്ട്ടിയെ ബഹുജന മധ്യത്തില് തെറ്റിദ്ധരിപ്പിക്കുന്ന നിലയില് ആരോപണങ്ങള് ഉന്നയിച്ച് എതിരാളികള്ക്ക് കടന്നാക്രമിക്കാന് ആയുധം നല്കുന്ന കുഞ്ഞികൃഷ്ണന്റെ പ്രതികരണം അംഗീകരിക്കാന് കഴിയാത്തതാണെന്നും ജില്ലാ നേതൃത്വം വ്യക്തമാക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
