പാലക്കാട്: സിപിഎം പാലക്കാട് ജില്ലാ സെക്രട്ടറിയേറ്റ് അംഗം എന്‍ ഉണ്ണികൃഷ്ണന്‍ (68) അന്തരിച്ചു. അര്‍ബുദ രോഗത്തെ തുടര്‍ന്ന് പെരിന്തല്‍മണ്ണ ഇ എം എസ് സഹകരണ ആശുപത്രിയില്‍ ചികിത്സയിലിരിക്കെ വ്യാഴാഴ്ച വൈകീട്ട് 5.53നായിരുന്നു അന്ത്യം. സംസ്‌കാരം വെള്ളിയാഴ്ച പകല്‍ 11 ന് ഷൊര്‍ണൂര്‍ ശാന്തി തീരത്ത് നടക്കും.
സിഐടിയു സംസ്ഥാന കമ്മിറ്റി അംഗം, റെയ്ഡ്കോ വൈസ് ചെയര്‍മാന്‍, ഷൊര്‍ണൂര്‍ സര്‍വീസ് ബാങ്ക് പ്രസിഡന്റ്, എഐആര്‍ടിഡബ്ല്യുഎഫ് അഖിലേന്ത്യാ സെക്രട്ടറി, ഓട്ടോ- ടാക്‌സി ലൈറ്റ് മോട്ടോര്‍ വര്‍ക്കേഴ്‌സ് ഫെഡറേഷന്‍ (സിഐടിയു) സംസ്ഥാന പ്രസിഡന്റ് എന്നീ ചുമതലകള്‍ നിര്‍വഹിച്ചു വരികയായിരുന്നു.
കോണ്‍ഗ്രസിലൂടെയാണ് രാഷ്ട്രീയ പ്രവര്‍ത്തനം ആരംഭിച്ചത്. യൂത്ത് കോണ്‍ഗ്രസ് പട്ടാമ്പി ബ്ലോക്ക് പ്രസിഡന്റായിരുന്ന ഉണ്ണികൃഷ്ണന്‍ അടിയന്തരാവസ്ഥക്കുശേഷം കോണ്‍ഗ്രസ് രാഷ്ട്രീയം ഉപേക്ഷിച്ച് 1979 ലാണ് സിപിഎമ്മിനൊപ്പം ചേര്‍ന്നത്. 1980 ല്‍നടന്ന കെഎസ്‌ വൈഎഫ് ഓങ്ങല്ലൂര്‍ പഞ്ചായത്ത് സമ്മേളനത്തില്‍ ജോയിന്റ് സെക്രട്ടറിയായി തെരഞ്ഞെടുക്കപ്പെട്ടു. 1981 ല്‍ ഡിവൈഎഫ്‌ഐ പട്ടാമ്പി ബ്ലോക്ക് കമ്മിറ്റി അംഗമായി. 1983 ല്‍ ബ്ലോക്ക് പ്രസിഡന്റും പിന്നീട് സെക്രട്ടറിയുമായി. ജില്ലാകമ്മിറ്റിയംഗം, ജില്ലാ എക്‌സിക്യൂട്ടീവംഗം എന്നീ നിലകളിലും പ്രവര്‍ത്തിച്ചു.
സിപിഎം നെല്ലായ, കൊപ്പം, പട്ടാമ്പി, ഓങ്ങല്ലൂര്‍ എന്നി ലോക്കല്‍ കമ്മിറ്റികളുടെ സെക്രട്ടറിയായി. 1993 മുതല്‍ 2010 വരെ സിപിഐ എം പട്ടാമ്പി ഏരിയ സെക്രട്ടറിയായി. 1993 മുതല്‍ സിപിഎം ജില്ലാ കമ്മിറ്റി അംഗമാണ്. 2022 ജനുവരിയില്‍ നടന്ന സമ്മേളനത്തിലാണ് ജില്ലാ സെക്രട്ടറിയേറ്റ് അംഗമായത്.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
