അരിക്കൊമ്പനെ പിടിക്കാൻ എത്തിച്ച കുങ്കിയാനകളുടെ താവളം മാറ്റി; പുതിയ ക്യാമ്പ് 301 കോളനിയിൽ

തൊടുപുഴ: ‌‌അരിക്കൊമ്പനെ പിടികൂടാനുള്ള ദൗത്യത്തിന്​ ഇടുക്കിയിലെത്തിച്ച കുങ്കിയാനകളുടെ താവളം വനം വകുപ്പ്​ മാറ്റി. നാല്​ കുങ്കിയാനകൾക്കും 301 കോളനിക്ക് സമീപത്താണ്​ പുതിയ താത്കാലിക ക്യാമ്പ്​ ഒരുക്കിയിരിക്കുന്നത്​.
 
കുങ്കിയാനകൾ നേരത്തെ ചിന്നക്കനാൽ സിമന്റ് പാലത്തെ ക്യാമ്പിലായിരുന്നു. ഇവിടെ സഞ്ചാരികളുടെ തിരക്ക് വനം വകുപ്പിന് ബുദ്ധിമുട്ട് സൃഷ്ടിച്ചതിനാലാണ് താവളം മാറ്റിയത്. കോളനിയില്‍ താമസക്കാര്‍ ഒഴിഞ്ഞുപോയ വീടുകള്‍ക്കും ആനയിറങ്കല്‍ ജലാശയത്തിനും സമീപമാണ് ക്യാമ്പ്​. കുങ്കിയാനകളുടെ പാപ്പാന്മാര്‍ക്കും മറ്റ് ജീവനക്കാര്‍ക്കും ഈ വീടുകളിൽ താമസസൗകര്യവും ഒരുക്കിയിട്ടുണ്ട്. 

ദൗത്യ സംഘാംഗങ്ങളും ജീവനക്കാരുമുൾപ്പെടെ ഇരുപത്തിയഞ്ചോളം പേരാണ് ആഴ്ചകളായി ഇടുക്കിയിലുള്ളത്. അതേസമയം അരിക്കൊമ്പനെ പറമ്പിക്കുളത്തേക്ക് എത്തിക്കുന്നതില്‍ പ്രതിഷേധിച്ച് നാളെ നെല്ലിയാമ്പതിയില്‍ ഹര്‍ത്താല്‍ ആണ്. വിഷയത്തിൽ ഹൈക്കോടതി ഉത്തരവുകളെ ചോദ്യം ചെയ്ത് സംസ്ഥാന സർക്കാർ സുപ്രീം കോടതിയിൽ അപ്പീൽ നൽകി‌യിട്ടുമുണ്ട്. 

ഈ വാര്‍ത്ത കൂടി വായിക്കൂ 

എലത്തൂര്‍ ട്രെയിന്‍ തീവെപ്പ്: ഷാറൂഖ് സെയ്ഫിക്ക് എതിരെ യുഎപിഎ ചുമത്തി 

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ