സിപിഎം മുൻ എംഎൽഎ പഞ്ചായത്ത് തെരഞ്ഞെടുപ്പിൽ മത്സരരം​ഗത്ത്

പത്തനംതിട്ട : സിപിഎം നേതാവും മുന്‍ എംഎല്‍എയുമായ കെ സി രാജഗോപാൽ തദ്ദേശ തെരഞ്ഞെടുപ്പില്‍ മത്സരിക്കുന്നു. മെഴുവേലി ഗ്രാമപ്പഞ്ചായത്ത് എട്ടാം വാര്‍ഡിലാണ് രാജ​ഗോപാൽ സ്ഥാനാര്‍ത്ഥിയായി മത്സരിക്കുന്നത്. നിലവില്‍ സിഐടിയു സംസ്ഥാന കമ്മിറ്റി അംഗമാണ്.

1979-ലെ പഞ്ചായത്ത് തെരഞ്ഞെടുപ്പിലൂടെയാണ് രാജഗോപാൽ തെരഞ്ഞെടുപ്പ് രംഗത്തിറങ്ങുന്നത്. അന്ന് വിജയിച്ച് മെഴുവേലി പഞ്ചായത്ത് വൈസ് പ്രസിഡന്റായിരുന്നു. 1988-ല്‍ പഞ്ചായത്ത് പ്രസിഡന്റായും തെരഞ്ഞെടുക്കപ്പെട്ടു. 2006-ലാണ് ആറന്മുള മണ്ഡലത്തിൽ നിന്നും വിജയിച്ച് രാജ​ഗോപാൽ നിയമസഭയിലെത്തുന്നത്.

2011-ലെ തെരഞ്ഞെടുപ്പില്‍ കെ ശിവദാസന്‍ നായരോട് പരാജയപ്പെട്ടു. സിപിഎമ്മില്‍ വി എസ് പക്ഷമായിരുന്നു. മെഴുവേലി പഞ്ചായത്തിലെ ഇലവുംതിട്ട നെടിയകാല സ്വദേശിയായ രാജഗോപാല്‍ അവിവാഹിതനാണ്. സിപിഎം ജില്ലാ സെക്രട്ടേറിയറ്റ് അംഗമായും സിഐടിയു ജില്ലാ സെക്രട്ടറിയായും പ്രവര്‍ത്തിച്ചിട്ടുണ്ട്.