പാകിസ്ഥാനിൽ റാഞ്ചിയ ട്രെയിനിലെ ബന്ദികളെ മോചിപ്പിച്ചു; പൊങ്കാലയ്ക്കൊരുങ്ങി തലസ്ഥാന ന​ഗരി; ഇന്നത്തെ 5 പ്രധാന വാർത്തകൾ

സംസ്ഥാനത്ത് ഒറ്റപ്പെട്ട മഴ ഇന്നും തുടരും. മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ഒറ്റപ്പെട്ടയിടങ്ങളിൽ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഇടിമിന്നലിനും ശക്തമായ കാറ്റിനും സാധ്യതയുണ്ട്

പാകിസ്ഥാനിലെ ബലൂചിസ്ഥാന്‍ പ്രവിശ്യയില്‍ ബലൂച് ലിബറേഷന്‍ ആര്‍മി (ബിഎല്‍എ) ബന്ദിയാക്കിയ ട്രെയിന്‍ യാത്രക്കാരെ മുഴുവന്‍ മോചിപ്പിച്ചെന്ന് സൈന്യം. ട്രെയിനില്‍ സ്‌ഫോടകവസ്തുക്കള്‍ ദേഹത്തുവെച്ചുകെട്ടി നിലയുറപ്പിച്ചിരുന്ന 33 ചാവേറുകളെ വധിച്ചു. സംഭവത്തില്‍ 21 യാത്രക്കാരും 4 സൈനികരും കൊല്ലപ്പെട്ടെന്നും പാക് സൈന്യം അറിയിച്ചു.

സാങ്കേതിക തകരാറിനെത്തുടർന്ന് ഇന്ന് പുറപ്പെടേണ്ടിയിരുന്ന സ്‌പേസ് എക്‌സ് ക്രൂ 10 വിക്ഷേപണം മാറ്റിവെച്ചു. ഇതോടെ സുനിത വില്യംസ് അടക്കമുള്ളവരുടെ തിരിച്ചുവരവ് വൈകും. നാളെ രാവിലെ സ്‌പേസ് എക്‌സ് ക്രൂ 10 വിക്ഷേപണം നടക്കുമെന്നാണ് പുതിയ അറിയിപ്പ്

ആറ്റുകാൽ പൊങ്കാല ഇന്ന്. അടുപ്പുകൾ കൂട്ടി, ഒരുക്കങ്ങൾ പൂർത്തിയാക്കി ആറ്റുകാൽ അമ്മയ്ക്ക് പൊങ്കാല അർപ്പിക്കാൻ പ്രാർഥനയോടെ കാത്തിരിക്കുകയാണ് ഭക്തർ. തലസ്ഥാന നഗരിയിലെങ്ങും ഭക്തരുടെ വലിയ തിരക്കാണ് അനുഭവപ്പെടുന്നത്

ശബരിമലയിൽ പുതിയ ദർശന രീതി നാളെ മുതൽ നടപ്പാക്കും. പുതിയ ദർശന രീതിയിൽ ഇരുമുടിക്കെട്ടുമായി വരുന്ന തീർഥാടകർക്കാണ് മുൻ​ഗണന. മീന മാസ പൂജയ്ക്ക് നാളെ വൈകിട്ട് 5 ന് നട തുറക്കും.

ഹോളിയോട് അനുബന്ധിച്ച് സ്പെഷൽ ട്രെയിനുകളുമായി ഇന്ത്യൻ റെയിൽവേ. ഡൽഹി, മുംബൈ ഹോളി സ്പെഷൽ ട്രെയിനുകൾ റെയിൽവേ പ്രഖ്യാപിച്ചു. കൊല്ലം, കായംകുളം, മാവേലിക്കര, ചെങ്ങന്നൂർ, തിരുവല്ല, കോട്ടയം, എറണാകുളം ടൗൺ, ആലുവ, തൃശൂർ, പാലക്കാട് എന്നിവിടങ്ങളിലാണ് കേരളത്തിലെ സ്റ്റോപ്പുകൾ