തിരുവനന്തപുരം: മുന് കേരള ഡിജിപിയും തിരുവനന്തപുരം കോര്പറേഷന് കൗണ്സിലറുമായ ആര് ശ്രീലേഖക്കെതിരെ പോക്സോ കേസ്. പീഡനക്കേസ് ഇരകളുടെ പേര് യുട്യൂബ് ചാനലിലൂടെ വെളിപ്പെടുത്തിയ സംഭവത്താണ് നടപടി. തിരുവനന്തപുരം ആസ്ഥാനമായി പ്രവര്ത്തിക്കുന്ന മനുഷ്യാവകാശ സംഘടനയായ സിവില് റൈറ്റ്സ് ആന്ഡ് സോഷ്യല് ജസ്റ്റിസ് സൊസൈറ്റി സെക്രട്ടറി ആര്. ജയചന്ദ്രന് നല്കിയ പരാതിയില് തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് 3 കോടതിയാണ് കേസെടുക്കാന് നിര്ദേശം നല്കിയത്.
നിരവധി പീഡന കേസുകളിലെ പ്രായപൂര്ത്തി ആയിട്ടില്ലാത്തടക്കമുള്ള ഇരകളുടെ പേരും മറ്റു വിശദാംശങ്ങളും വെളിപ്പെടുത്തിയെന്നാണ് പരാതി. ഡല്ഹി നിര്ഭയ കേസ്, കിളിരൂര്- കവിയൂര് കേസുകള്, ഗോവിന്ദച്ചാമി പ്രതിയായ ട്രെയിനില് വച്ച് കൊല്ലപ്പെട്ട പെണ്കുട്ടിയുടെയും പെരുമ്പാവൂര് പീഡന കേസുകളും പരാതിയില് പരാമര്ശിച്ചിട്ടുണ്ട്. കോടതി നിര്ദേശത്തിന്റെ പശ്ചാത്തലത്തില് തിരുവനന്തപുരം മ്യൂസിയം പൊലീസ് എഫ്ഐആര് രജിസ്റ്റര് ചെയ്യുകയായിരുന്നു.
ശ്രീലേഖയ്ക്കെതിരെ കേസെടുക്കണമെന്ന് ആവശ്യപ്പെട്ട് പരാതിയുമായി ആര്. ജയചന്ദ്രന് തിരുവനന്തപുരം മ്യൂസിയം പൊലീസിനെ സമീപിച്ചിരുന്നു. എന്നാല് എഫ്ഐആര് രജിസ്റ്റര് ചെയ്തിരുന്നില്ല. ഇതിനെ തുടര്ന്ന് പരാതിക്കാരന് കോടതിയെ സമീപിക്കുകയായിരുന്നു. മുന് ഡിജിപി ആയിരുന്ന ശ്രീലേഖയുടെ ശക്തമായ സ്വാധീനം മൂലമാണ് പൊലീസ് നടപടി സ്വീകരിക്കാതിരുന്നതെന്നും ആരോപണമുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
