തിരുവനന്തപുരത്തും തർക്കം; സിപിഎം മം​ഗലപുരം ഏരിയാ സെക്രട്ടറിയെ മാറ്റി, ഇനി പാർട്ടിക്കൊപ്പമില്ലെന്ന് മധു മുല്ലശ്ശേരി

‌തിരുവനന്തപുരം: സിപിഎം ഏരിയാ സമ്മേളനത്തിനിടെ തിരുവനന്തപുരത്തും തർക്കം. മം​ഗലപുരം ഏരിയാ സമ്മേളനത്തിലാണ് പൊട്ടിത്തെറി. സമ്മേളനത്തിൽ നിന്നു ഏരിയാ സെക്രട്ടറി മധു മുല്ലശ്ശേരി ഇറങ്ങിപ്പോയി. പാർട്ടി ജില്ലാ സെക്രട്ടറി വി ജോയിയുടെ നിലപാടിൽ പ്രതിഷേധിച്ചാണ് മധു മുല്ലശ്ശേരി ഇറങ്ങിപ്പോയത്. ജോയി പാർട്ടിയിൽ വിഭാ​ഗീയത സൃഷ്ടിക്കുകയാണെന്നും ഇനി സിപിഎമ്മിനൊപ്പമില്ലെന്നും മധു പ്രഖ്യാപിച്ചു.

കഴക്കൂട്ടം ഏരിയാ കമ്മിറ്റി രണ്ടായതിനു ശേഷം മം​ഗലപുരത്ത് രണ്ട് തവണയും മധു മുല്ലശ്ശേരിയാണ് സെക്രട്ടറിയായത്. സാധാരണ പാർട്ടി പ്രവർത്തകർക്ക് സമീപിക്കാൻ സാധിക്കാത്ത ആളായി ഏരിയാ സെക്രട്ടറി മാറിയെന്ന ആരോപണമാണ് മധുവിനെതിരെ ഉയർന്നത്. പുതിയ ഏരിയാ കമ്മിറ്റി ചേർന്നപ്പോൾ മധുവിനു പകരം എം ജലീലിനെ സെക്രട്ടറിയായി തെരഞ്ഞെടുത്തു. പിന്നാലെയാണ് അപ്രതീക്ഷിത നീക്കത്തിൽ പ്രതിഷേധിച്ച് മധു ഇറങ്ങിപ്പോയത്.

കരുനാഗപ്പള്ളിയിലേത് ഒറ്റപ്പെട്ട സംഭവം; പാര്‍ട്ടിക്ക് അപമാനല്ല, തെറ്റായ പ്രവണതളോട് കോംപ്രമൈസ് ഇല്ല; എംവി ഗോവിന്ദന്‍

സംസ്ഥാനത്ത് പലയിടത്തും പാർട്ടിയുടെ പ്രാദേശിക തലത്തിൽ വിഭാ​ഗീയത പൊട്ടിത്തെറിയിൽ കലാശിക്കുന്നതിനിടെയാണ് മം​ഗലപുരത്തും തർക്കത്തിൽ അവസാനിച്ചത്. മധു തുടരുന്നതിൽ ജില്ലാ നേതൃത്വത്തിനു താത്പര്യമുണ്ടായിരുന്നില്ലെന്നു റിപ്പോർട്ടുകളുണ്ട്. സാമ്പത്തിക ആരോപണങ്ങളും ക്രമവിരുദ്ധ ഇടപെടലുകളും അദ്ദേഹത്തിനെതിരെ ഉയർന്നിരുന്നു. ഇതിനെതിരെ ജില്ലാ നേതൃത്വം ഇടപെട്ടു. പിന്നാലെയാണ് മധു പാർട്ടി വിടുകയാണെന്നു പ്രഖ്യാപിച്ചത്.