'സി സദാനന്ദന്‍ വധശ്രമക്കേസില്‍ പ്രതി ചേര്‍ക്കപ്പെട്ടവര്‍ കുറ്റം ചെയ്തതായി വിശ്വസിക്കുന്നില്ല' യാത്രയയപ്പ് തെറ്റല്ലെന്ന് ശൈലജ
കണ്ണൂര്‍: സി സദാന്ദന്‍ വധശ്രമക്കേസിലെ പ്രതികള്‍ക്ക് യാത്രയയപ്പ് നടത്തിയതിനെ ന്യായീകരിച്ച് കെകെ ശൈലജ എംഎല്‍എ. താന്‍ കമ്യൂണിസ്റ്റ് പാര്‍ട്ടി പ്രവര്‍ത്തകയാണെന്നും നാട്ടിലെ രാഷട്രീയ പ്രവര്‍ത്തകരാണ് അവര്‍, നാട്ടുകാരി എന്ന നിലയിലാണ് പങ്കെടുത്തതെന്നും കെ കെ ശൈലജ പ്രതികരിച്ചു.
'അവര്‍ പാര്‍ട്ടി പ്രവര്‍ത്തകരാണ്, മാന്യമായി ജീവിതം നയിക്കുന്നവരാണവര്‍, തന്റെ അറിവില്‍ നാട്ടിലെ നന്മയ്ക്ക് വേണ്ടി പ്രവര്‍ത്തിക്കുന്നവരാണവര്‍. കുറ്റകൃത്യത്തെ നായികരിക്കാന്‍ അല്ല പോയത്. കോടതി വിധിയെ മാനിക്കുന്നു. അവര്‍ അങ്ങനെ ഒരു പ്രവര്‍ത്തനത്തില്‍ ഉള്‍പ്പെടുന്നവരല്ലെന്നാണ് നാട്ടുകാരുടെ ഉള്‍പ്പെടെ അഭിപ്രായം. പ്രതികളെ പാര്‍ട്ടിയില്‍ നിന്ന് പുറത്താക്കിയിട്ടില്ല. പ്രതികളുടെ കുടുംബാംഗങ്ങള്‍ ഏറെ ദുഃഖത്തിലാണ്. അവര്‍ തെറ്റുകാരല്ലെന്ന് അവരുടെ കുടുംബം വിശ്വസിക്കുന്നു, എങ്കിലും കോടതി വിധിയെ തങ്ങള്‍ മാനിക്കുന്നു. മൊഴികളുടെ അടിസ്ഥാനത്തിലാണ് ആ വിധി വന്നത്. ഇത് യാത്രയയപ്പായി കാണാന്‍ കഴിയില്ലെന്നും തെറ്റായ യാതൊരു സന്ദേശവും ഇതില്‍ ഇല്ലെന്നും കെകെ ശൈലജ പറഞ്ഞു.
ബിജെപി നേതാവും രാജ്യസഭ എംപിയുമായ സി. സദാനന്ദന്‍ വധശ്രമക്കേസിലാണ് സിപിഎം പ്രവര്‍ത്തകരായ എട്ട് പ്രതികള്‍ വര്‍ഷങ്ങള്‍ക്കുശേഷം കോടതിയില്‍ കീഴടങ്ങിയത്. സദാനന്ദനെ ഉരുവച്ചാല്‍ ടൗണില്‍ വെച്ച് ആക്രമിക്കുകകയും ഇരുകാലുകളും വെട്ടി മാറ്റുകയും ചെയ്ത കേസില്‍ 30 വര്‍ഷത്തിന് ശേഷമാണ് പ്രതികള്‍ക്ക് ഏഴു വര്‍ഷം ശിക്ഷ വിധിച്ചത്.
മട്ടന്നൂര്‍ ഉരുവച്ചാലിലെ പഴശ്ശി രക്തസാക്ഷി മന്ദിരത്തില്‍നിന്ന് സിപിഎം നേതാക്കളും പ്രവര്‍ത്തകരും പ്രതികള്‍ക്ക് യാത്രയയപ്പ് നല്‍കുകയായിരുന്നു. പ്രതികളെ യാത്രയാക്കാന്‍ സ്ഥലം എംഎല്‍എയായ ശൈലജ ഉള്‍പ്പെടെയുള്ള നേതാക്കള്‍ സിപിഎം പഴശ്ശി സൗത്ത് ലോക്കല്‍ കമ്മിറ്റി ഓഫിസില്‍ എത്തിയിരുന്നു. കോടതിയില്‍ കീഴടങ്ങാനായി പോകുന്ന പ്രതികളായ സിപിഎം പ്രവര്‍ത്തകര്‍ക്കായി മുദ്രാവാക്യം മുഴക്കുന്ന ദൃശ്യങ്ങളും പുറത്തുവന്നിരുന്നു. കോടതി നടപടികള്‍ക്കുശേഷം പ്രതികളെ കണ്ണൂര്‍ സെന്‍ട്രല്‍ ജയിലിലേക്ക് മാറ്റി.
K K Shailaja defends farewell to C. Sadanandan murder accused
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
