മഴയോണം; ഇന്ന് ഉത്രാടപ്പാച്ചില്‍; മലയാളത്തിന് അഭിമാനമായി കസിയ; ഇന്നത്തെ അഞ്ച് പ്രധാന വാര്‍ത്തകള്‍

തിരുവോണം കളറാക്കാനുള്ള അവസാനവട്ട ഓട്ടവുമായി ഉത്രാടപ്പാച്ചിലിന്റെ തിരക്കിലാണ് ഇന്ന് മലയാളികള്‍. ഉത്രാടദിനത്തില്‍ സംസ്ഥാനത്ത് പരക്കെ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഒന്‍പത് ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചു. 'മിസ് യൂണിവേഴ്സ് ഇന്ത്യ 2026' സൗന്ദര്യ മത്സരത്തില്‍ കേരളത്തിന്റെ കസിയ ലിസ് മേജോ കിരീടം സ്വന്തമാക്കി. അറിയാം ഇന്നത്തെ അഞ്ച് പ്രധാന വാര്‍ത്തകള്‍

സംസ്ഥാനത്ത് ഇന്നും നാളെയും പരക്കെ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്. ശക്തമായ മഴയ്ക്ക് സാധ്യത കണക്കിലെടുത്ത് ചൊവ്വാഴ്ച വിവിധ ജില്ലകളിൽ യെല്ലോ അലർട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട് ജില്ലകളിലാണ് മഴ മുന്നറിയിപ്പ്. നാളെയും വിവിധ ജില്ലകളിൽ മഴ തുടരും. ബുധനാഴ്ച പത്തനംതിട്ട, കോട്ടയം, എറണാകുളം, ഇടുക്കി ജില്ലകളിലാണ് യെല്ലോ അലർട്ട്.

 'മിസ് യൂണിവേഴ്‌സ് ഇന്ത്യ 2026' സൗന്ദര്യ മത്സരത്തിൽ കേരളത്തിന്റെ കസിയ ലിസ് മേജോ കിരീടം സ്വന്തമാക്കി. രാജ്യത്തിന്റെ വിവിധ ഭാഗങ്ങളിൽ നിന്നുള്ള 52 സുന്ദരിമാരെ പിന്നിലാക്കിയാണ് കസിയയുടെ നേട്ടം. വരുന്ന നവംബറിൽ പ്യുർട്ടോറിക്കോയിൽ നടക്കുന്ന 75ാമത് മിസ് യൂണിവേഴ്‌സ് സൗന്ദര്യ മത്സരത്തിൽ ഇന്ത്യയെ പ്രതിനിധീകരിക്കാനുള്ള അപൂർവ ഭാഗ്യം 19കാരിയായ ആലപ്പുഴക്കാരി സ്വന്തമാക്കി.

സാമ്പാറും, അവിയലോ, രസമോ ഒന്നും ഉണ്ടായിരുന്നില്ല മുന്‍പത്തെ ഓണസദ്യയില്‍. ഇന്ന് കാണുന്ന ഓണസദ്യയിലെ പലവിഭങ്ങളും ഇലയില്‍ ഇടംപിടിച്ചത് അടുത്ത കാലത്തെന്നാണ് ചരിത്രകാരന്‍മാര്‍ പറയുന്നത്. മുന്‍പ് നാലുകറികള്‍ ആയിരുന്നത്രേ ഓണസദ്യയുടെ ആകര്‍ഷണം. കാളന്‍, ഒലന്‍, എരിശ്ശേരി, പുളിശ്ശേരി. ഇവയോടൊപ്പം ഉപ്പേരിയും അച്ചാറും പപ്പടവും ഉണ്ടായിരുന്നു. അവസാനം പായസങ്ങളും.

ഓണം, ആഘോഷിക്കാത്ത മലയാളികള്‍ എവിടെയും ഉണ്ടാകില്ല. ഇത് കേവലം ഒരു ആഘോഷം എന്നതിലുപരി, കാര്‍ഷിക വിളവെടുപ്പിന്റെയും സമൃദ്ധിയുടെയും സന്തോഷത്തിന്റെയും പ്രതീകമാണ് തിരുവോണം. തിരുവോണം കളറാക്കാനുള്ള അവസാനവട്ട ഓട്ടവുമായി ഉത്രാടപ്പാച്ചിലിന്റെ തിരക്കിലാണ് ഇന്ന് മലയാളികള്‍. പൂവും ഓണക്കോടിയും ഓണസദ്യ വിഭവങ്ങളുമെല്ലാമായി ഇന്ന് രാത്രി വൈകുംവരെ വിപണി സജീവമായിരിക്കും.

മലയാളിയായ ആനി ജോര്‍ജ് മാത്യു റിസര്‍വ് ബാങ്ക് സെന്‍ട്രല്‍ ബോര്‍ഡ് ഡയറക്ടര്‍. മൂന്ന് പുതിയ ഡയറക്ടര്‍മാരെ കേന്ദ്രസര്‍ക്കാര്‍ നിയമിച്ചു. സയ്യിദ് അക്ബറുദ്ദീന്‍, ജെകെ സിന്‍ഹ എന്നിവരാണ് മറ്റ് ഡയറക്ടര്‍മാര്‍. 1988 ബാച്ചിലെ ഇന്ത്യന്‍ ഓഡിറ്റ് ആന്‍ഡ് അക്കൗണ്ട് സര്‍വീസ് ഉദ്യോഗസ്ഥയാണ് കോട്ടയം സ്വദേശിയ ആനി ജോര്‍ജ് മാത്യു.