കോഴിക്കോട് സിക വൈറസ് സ്ഥിരീകരിച്ചു; രോഗം ബംഗളൂരുവില്‍ നിന്ന് എത്തിയ 29കാരിക്ക് 

കോഴിക്കോട്: ബം​ഗളൂരുവിൽ നിന്ന് കേരളത്തിലേക്ക് എത്തിയ യുവതിക്ക് സിക വൈറസ്. 29കാരിയായ ചേവായൂർ സ്വദേശിനിക്കാണ് സിക സ്ഥിരീകരിച്ചിരിക്കുന്നത്. യുവതി നിലിവൽ ആശുപത്രി വിട്ടു.

നവംബർ 17നാണ് ബംഗളൂരുവിൽ നിന്ന് ഇവർ കേരളത്തിൽ എത്തിയത്. വയറുവേദന ഉൾപ്പെടെ ആരോഗ്യ പ്രശ്​നങ്ങൾ നേരിട്ടതോടെ സ്വകാര്യ ആ​ശുപത്രിയിൽ ചികിത്സ തേടി. പരിശോധനയിൽ​ ​വൈറസ്​ സാന്നിധ്യം സംശയിച്ചതോടെ വിദ​ഗ്ധ പരിശോധനയ്ക്കായി അയച്ചു​.​ പുനെ വൈറോളജി ഇൻസ്​റ്റിറ്റ്യൂട്ടിൽ പരിശോധിച്ചപ്പോൾ​ സിക ബാധ സ്ഥിരീകരിച്ചു​. 

ഒരു മണിക്കൂർ മാത്രമാണ്​ ഇവർ ആശുപത്രിയിൽ ഉണ്ടായത്​. രോഗവിവരം അറിഞ്ഞതിനുപിന്നാലെ ആശുപത്രിയിൽ ഇവർ എത്തിയ ഇടം അണുമുക്തമാക്കി. വീട്ടിലെ കുടുംബാംഗങ്ങൾക്കോ ഒപ്പമുണ്ടായിരുന്നവർക്കോ വൈറസ്​ ബാധ ഉണ്ടായിട്ടില്ല.

പടരുന്നത് കൊതുകുകളിലൂടെ

കൊതുകുകളിലൂടെ പകരുന്ന ഫ്‌ളാവിവൈറസാണ് സിക വൈറസ്. ഉഗാണ്ടയിലെ കുരങ്ങുകളിലാണ് സിക വൈറസ് ആദ്യമായി കണ്ടെത്തുന്നത്. ‌1952 ൽ മനുഷ്യരിലും കണ്ടെത്തി. പനി, ശരീരത്തിൽ ചുവന്ന പാടുകൾ, കണ്ണിന് ചുവന്ന നിറം, സന്ധി വേദന, പേശി വേദന, തലവേദന എന്നിവയാണ് പ്രധാന ലക്ഷണങ്ങൾ.