ലതിക സുഭാഷിനും ഭർത്താവിനും കോവിഡ് 

കോട്ടയം: മുൻ മഹിളാ കോൺഗ്രസ് അധ്യക്ഷയും ഏറ്റുമാനൂരിലെ സ്വതന്ത്ര സ്ഥാനാർത്ഥിയുമായ ലതിക സുഭാഷിനും ഭർത്താവ് സുഭാഷിനും കോവിഡ് സ്ഥിരീകരിച്ചു. രോഗലക്ഷണങ്ങൾ കണ്ടതിനെ തുടർന്ന് കഴിഞ്ഞ വ്യാഴാഴ്ച പരിശോധന നടത്തി നിരീക്ഷണത്തിൽ കഴിയുകയായിരുന്നു ലതിക. തിങ്കളാഴ്ച ഫലമെത്തിയപ്പോഴാണ് കോവിഡ് പോസിറ്റീവാണെന്ന് വ്യക്തമായത്. ലതികയുടെ ഡ്രൈവർ ഉവൈസിനും വൈറസ് ബാധ സ്ഥിരീകരിച്ചിട്ടുണ്ട്.

നിയമസഭാ തിരഞ്ഞെടുപ്പിൽ കോൺ​ഗ്രസ് ടിക്കറ്റിൽ സ്ഥാനാർത്ഥിയാകാൻ അവസരം നല്കാതിരുന്നതിനെ തുടർന്ന് ലതിക രാജിവച്ചത് വലിയ വാർത്തയായിരുന്നു. കെപിസിസി ആസ്ഥാനത്തിന് മുമ്പിൽ വച്ച് തല മുണ്ഡനം ചെയ്തായിരുന്നു ലതികയുടെ പ്രതിഷേധം. തുടർന്നാണ് ഏറ്റുമാനൂരിൽ നിന്ന് സ്വതന്ത്ര സ്ഥാനാർത്ഥിയായി മത്സരിച്ചത്.