കല്യാണം വിളിക്കാനെത്തി, നായ കുരച്ചു ചാടിയപ്പോള്‍ കിണറ്റില്‍ വീണു; 60കാരന് പരിക്ക്

കണ്ണൂര്‍: പയ്യാവൂരില്‍ കല്യാണം ക്ഷണിക്കാന്‍ എത്തിയ ആള്‍ അയല്‍വാസിയുടെ കിണറ്റില്‍ വീണു. വെമ്പുവയിലെ കോയാടന്‍ രാജനാണ് (60) കിണറ്റില്‍ വീണ് കൈയ്ക്ക് പരിക്കേറ്റത്. വീട്ടുമുറ്റത്ത് കെട്ടിയിരുന്ന നായ കുരച്ചുചാടിയപ്പോള്‍ പേടിച്ച് കാല്‍വഴുതി സമീപത്തെ കിണറ്റില്‍ വീഴുകയായിരുന്നു.

തിങ്കളാഴ്ച രാവിലെ 11-നായിരുന്നു സംഭവം. വീടിന്റെ മുറ്റത്ത് തന്നെയാണ് കിണര്‍. ആള്‍മറയുള്ള കിണറാണെങ്കിലും നായ കുരച്ചുചാടിയപ്പോള്‍ കിണറ്റിന് മുകളില്‍ കയറിയ രാജന്‍ കാല്‍വഴുതി വീഴുകയായിരുന്നു. നാലടിയോളം വെള്ളമുള്ള കിണറ്റിലേയ്ക്കാണ് ഇയാള്‍ വീണത്.

ഇരിട്ടിയില്‍നിന്ന് എത്തിയ അഗ്‌നിരക്ഷാസേന ഉദ്യോഗസ്ഥരാണ് രാജനെ പുറത്തെത്തിച്ചത്. പ്രാഥമിക ശുശ്രൂഷ നല്‍കിയശേഷം പയ്യാവൂരിലെ സ്വകാര്യ ആസ്പത്രിയില്‍ പ്രവേശിപ്പിച്ചു.