തൃശൂര്: മണലൂരില് യുവതി വാടക വീട്ടില് മരിച്ച നിലയില്. മണലൂര് തൃക്കുന്ന് സ്വദേശി പുത്തന്പുരയ്ക്കല് സലീഷിന്റെ ഭാര്യ നിഷമോള് (35) ആണ് മരിച്ചത്. സംഭവത്തിന് പിന്നാലെ ഇവരുടെ ഭര്ത്താവിനെ കാണാതായി.
മണലൂര് ഗവ.ഐടിഐ റോഡില് വാടകവീട്ടിലെ മുറിയില് ഇന്നലെ രാവിലെയാണ് നിഷയെ മരിച്ച നിലയില് കണ്ടത്. അമ്മ ഉണരുന്നില്ലെന്ന് കുട്ടികള് അടുത്തവീട്ടില് ചെന്ന് അറിയിച്ചതിനെത്തുടര്ന്ന് അയല്ക്കാര് നടത്തിയ പരിശോധനയിലാണ് മരണ വിവരം അറിയുന്നത്. ഈ സമയത്ത് സലീഷ് വീട്ടിലുണ്ടായിരുന്നില്ല.
തുടര്ന്ന് അന്തിക്കാട് പൊലീസ് സ്ഥലത്തെത്തി സലീഷുമായി ബന്ധപ്പെടാന് ശ്രമിച്ചെങ്കിലും ഫോണ് ഓഫ് ചെയ്ത നിലയില് ആയിരുന്നു. സലീഷ് വരാതിരുന്നതിനെ തുടര്ന്ന് വൈകിട്ട് മൃതദേഹം മോര്ച്ചറിയിലേക്ക് മാറ്റി. അതേസമയം, നിഷമോളുടെ മരണ കാരണം സംബന്ധിച്ച് പോസ്റ്റ്മോര്ട്ടം കഴിഞ്ഞാല് മാത്രമേ വ്യക്തത ലഭിക്കു എന്നാണ് പൊലീസ് നിലപാട്.
ചാലക്കുടി സ്വദേശിനിയായ നിഷയുടെ രണ്ടാം ഭര്ത്താവാണ് സലീഷ്. നിഷയുടെ ആദ്യ ഭര്ത്താവിന്റെ കുട്ടികളാണ് ഇവര്ക്കൊപ്പമുള്ളത്. സലീഷുമായുള്ള ബന്ധത്തില് മക്കളില്ല. നിഷയെ സലീഷ് മര്ദിക്കാറുണ്ടെന്നും പൊലീസില് നേരത്തേ പല തവണ പരാതി നല്കിയിട്ടുണ്ടെന്നും റിപ്പോര്ട്ടുകളുണ്ട്. കാഞ്ഞാണിയിലെ സ്വകാര്യസ്ഥാപനത്തില് സെയില്സ് ജോലി ചെയ്തുവരുന്ന നിഷ നിഷ രണ്ടു ദിവസമായി അവധിയിലായിരുന്നെന്നാണ് വിവരം. മക്കള്: വൈഗ, വേദ.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
