മന്നം ജയന്തി അവധിയായി പ്രഖ്യാപിച്ചില്ല; മുന്നാക്ക സംവരണത്തിൽ വീഴ്ച വരുത്തി; മുഖ്യമന്ത്രിയുടെ ജില്ലാതല സമ്പർക്ക പരിപാടി ബഹിഷ്കരിച്ച് എൻഎസ്എസ്

കൊല്ലം: മുഖ്യമന്ത്രിയുടെ കേരള പര്യടനത്തിന്റെ ഭാ​ഗമായുള്ള പരിപാടി ബഹിഷ്കരിച്ച് നായർ സർവീസ് സൊസൈറ്റി (എൻഎസ്എസ്). ജില്ലാതല സമ്പർക്ക പരിപാടിയാണ് എൻഎസ്എസ് ബഹിഷ്കരിച്ചത്. എൻഎസ്എസ് താലൂക്ക് ജില്ലാ പ്രസിഡന്റിനെയാണ് ക്ഷണിച്ചിരുന്നത്. 

എൻഎസ്എസിന്റെ ആവശ്യങ്ങൾ സർക്കാർ പരി​ഗണിക്കുന്നില്ല. ആവശ്യങ്ങളോട് മുഖംതിരിഞ്ഞ് നിൽക്കുന്ന സമീപനമാണ് സ്വീകരിക്കുന്നത്. മുന്നാക്ക സംവരണം നടപ്പാക്കുന്നതിൽ വീഴ്ച വരുത്തി. മന്നം ജയന്തി അവധിയായി പ്രഖ്യാപിച്ചില്ലെന്നും ഇക്കാരണങ്ങളാലാണ് ബഹിഷ്കരണ തീരുമാനമെന്നും താലൂക്ക് യൂണിയൻ വ്യക്തമാക്കി.  

നിയമസഭാ തെരഞ്ഞെടുപ്പിനു‌ മുന്നോടിയായാണ് മുഖ്യമന്ത്രിയുടെ കേരള പര്യടനം. പൊതു സമ്മേളനങ്ങൾ ഉണ്ടാകില്ല. ഭാവി കേരളത്തെക്കുറിച്ചുള്ള എൽഡിഎഫ്‌ കാഴ്‌ചപ്പാട്‌ രൂപീകരിക്കുകയെന്ന ലക്ഷ്യത്തോടെയാണ്‌ പര്യടനം. ഇതിന്‌ പ്രമുഖരുടെ അഭിപ്രായം മുഖ്യമന്ത്രി തേടും. കോവിഡ്‌ സാഹചര്യത്തിൽ വലിയ പരിപാടികൾ സംഘടിപ്പിക്കാൻ പരിമിതിയുള്ളതിനാലാണ്‌ എല്ലാ ജില്ലകളും സന്ദർശിച്ച്‌ നാനാതുറയിലുള്ളവരുമായി ആശയ വിനിമയം നടത്തുന്നത്‌.