വിരമിക്കൽ സൂചനയുമായി മെസി, ഇടമലക്കുടിയിൽ രോ​ഗിയെ കമ്പിൽ കെട്ടി ചുമന്ന് ​ഗോത്രജനത, എഫ്സിആർഎ ബിൽ ജെപിസിക്ക്; ഇന്നത്തെ 5 പ്രധാന വാർത്തകൾ

വിരമിക്കല്‍ സൂചന നല്‍കി അര്‍ജന്റീന ഇതിഹാസതാരം ലയണല്‍ മെസി. എഫ്‌സിആര്‍എ ബില്‍ ജെപിസിക്ക് വിട്ട് ലോക്‌സഭ. ഇടമലക്കുടിയില്‍ രോഗിയെ കമ്പില്‍ കെട്ടി ചുമന്ന് പുറത്തെത്തിച്ച് ഗോത്രജനതയുടെ ദുരിതം. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

വിരമിക്കൽ സൂചന നൽകി അർജന്റീന ഇതിഹാസം ലയണൽ മെസി. പിതാവ് ഹോർഹെ മെസിയുടെ മരണത്തിന് ശേഷം സമൂഹമാധ്യമത്തിൽ പങ്ക് വെച്ച കുറിപ്പിലാണ് താരം കളി തുടരാനില്ല എന്ന സൂചനകൾ നൽകിയിരിക്കുന്നത്. അച്ഛന്റെ വിയോഗം തന്നെ മാനസികമായി തകർത്തെന്നും അദ്ദേഹം ഇല്ലാതെ ഫുട്ബോളിൽ എത്ര കാലം മുന്നോട്ട് പോകാൻ കഴിയുമെന്ന് അറിയില്ലെന്നും മെസി കുറിപ്പിൽ പറയുന്നു.

അടിസ്ഥാന സൗകര്യങ്ങളുടെ അഭാവം മൂലം ഇടമലക്കുടിയിൽ വയോധികനായ രോഗിയെ കമ്പിൽ തുണി കെട്ടി ചുമന്ന് കാടിറങ്ങി ഗോത്രജനത. ഇടുക്കി ഇടമലക്കുടി ഗൂഡല്ലാർകുടി സ്വദേശിയായ 75 വയസ്സുകാരൻ മാലയപ്പനെയാണ് ചികിത്സയ്ക്കായി കിലോമീറ്ററുകളോളം ചുമന്നത്. കമ്പിൽ തുണി കെട്ടിയുണ്ടാക്കി അതിൽ കിടത്തിയാണ് കുടിനിവാസികൾ രോഗിയെ ചുമന്നത്. 

വിദേശ സംഭാവന നിയന്ത്രണ നിയമ ഭേദഗതി ബില്‍ ലോക്സഭ സംയുക്ത പാര്‍ലമെന്ററി സമിതിയ്ക്ക് വിട്ടു. പ്രതിപക്ഷത്തിന്റെ കനത്ത പ്രതിഷേധത്തിനിടെയാണ് ബിൽ ജെപിസിയ്ക്ക് വിട്ടത്. ആഭ്യന്തര സഹമന്ത്രി നിത്യാനന്ദ റായ് ആണ് ബിൽ ജെപിസിയ്ക്ക് വിടാനുള്ള പ്രമേയം അവതരിപ്പിച്ചത്. പ്രതിപക്ഷവും വിവിധ സംഘടനകളും ഉന്നയിച്ച ആശങ്കകൾ ജെപിസി പരിശോധിക്കുമെന്ന് കേന്ദ്രമന്ത്രി വ്യക്തമാക്കി.

സംസ്ഥാനത്ത് വീണ്ടും മഴ ശക്തമാകുന്നു.നാളെയും മറ്റന്നാളും വിവിധ ജില്ലകളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയാണ് കേന്ദ്ര കാലാവസ്ഥ വകുപ്പ് പ്രവചിക്കുന്നത്. നാളെ കണ്ണൂരിലും കാസര്‍കോടുമാണ് ശക്തമായ മഴ പ്രവചിക്കുന്നത്. വെള്ളിയാഴ്ച പത്തനംതിട്ട, കോട്ടയം, ഇടുക്കി ജില്ലകളിലാണ് ശക്തമായ മഴ പ്രവചിക്കുന്നത്. 

ടാറ്റ സണ്‍സ് ചെയര്‍മാന്‍ സ്ഥാനത്ത് നിന്ന് എന്‍ ചന്ദ്രശേഖരന്‍ രാജിവെച്ചു. ഓഗസ്റ്റ് 18ന് നടക്കാനിരിക്കുന്ന വാര്‍ഷിക പൊതുയോഗത്തിന് മുന്നോടിയായാണ് അദ്ദേഹത്തിന്റെ രാജി. കാലാവധി അവസാനിക്കുന്നതിന് മുന്‍പ് തന്നെ അദ്ദേഹം സ്ഥാനമൊഴിയുകയായിരുന്നു. 2027 ഫെബ്രുവരി വരെയാണ് അദ്ദേഹത്തിന്റെ കാലാവധി ഉണ്ടായിരുന്നത്, എന്നാല്‍ ഇനി പുനര്‍നിയമനം തേടേണ്ടതില്ലെന്ന് അദ്ദേഹം തീരുമാനിക്കുകയായിരുന്നു.