രാജമാണിക്യം തെറിച്ചു, പ്രശാന്ത് കെഎസ്ഇബി ചെയർമാൻ, തച്ചങ്കരിയെ കുടഞ്ഞ് കോടതി, മാപ്പെഴുതി നൽകിയാൽ സസ്പെൻഷൻ പിൻവലിക്കും; ഇന്നത്തെ 5 പ്രധാന വാർത്തകൾ

ഐഎഎസ് തലപ്പത്ത് വന്‍ അഴിച്ചുപണി നടത്തി സര്‍ക്കാര്‍. എംജി രാജമാണിക്യത്തെ മാറ്റി, എന്‍ പ്രശാന്തിനെ കെഎസ്ഇബി ചെയര്‍മാനാക്കി. കാലടി സര്‍വകലാശാലയില്‍ സമരം നടത്തിയ 12 പേരെ മാപ്പെഴുതി നല്‍കിയാല്‍ തിരിച്ചെടുക്കാമെന്ന് സിന്‍ഡിക്കേറ്റ്. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

മുതിർന്ന ഐ.എ.എസ് ഉദ്യോഗസ്ഥരെ മാറ്റിനിയമിച്ചുകൊണ്ട് പൊതുഭരണ വകുപ്പ് ഉത്തരവിറക്കി. കെഎസ്ഇബി ചെയർമാൻ ആൻഡ് മാനേജിങ് ഡയറക്ടർ സ്ഥാനത്തുനിന്ന് എം.ജി. രാജമാണിക്യത്തെ മാറ്റി. കായിക വകുപ്പ് സെക്രട്ടറിയായിരുന്ന എൻ. പ്രശാന്തിനെ കെഎസ്ഇബി ചെയർമാനായി നിയമിച്ചു. കെ ആർ ജ്യോതിലാലിനെ ആഭ്യന്തര സെക്രട്ടറിയായും, മിൻഹാജ് ആലത്തെ ധനവകുപ്പ് സെക്രട്ടറിയായും നിയമിച്ചു.

 മുന്‍ ഡിജിപി ടോമിന്‍ ജെ തച്ചങ്കരിയുടെ ജാമ്യഹര്‍ജിയില്‍ ചോദ്യങ്ങളുമായി ഹൈക്കോടതി. അനധികൃത സ്വത്ത് സമ്പാദന കേസില്‍ ശിക്ഷിക്കപ്പെട്ട ടോമിന്‍ ചികിത്സയിലായിരുന്നുവല്ലോയെന്നും പിന്നെ എങ്ങനെ വിദേശത്ത് പോകുമെന്നും കോടതി ചോദിച്ചു. വിദേശത്ത് ജോലിയുണ്ടെന്നും അവിടെ ജോലിയില്‍ പ്രവേശിച്ചില്ലെങ്കില്‍ തൊഴില്‍ നഷ്ടപ്പെടുമെന്നും അതുകൊണ്ട് ജാമ്യവ്യവസ്ഥയില്‍ ഇളവ് വേണമെന്നുമായിരുന്നു തച്ചങ്കരിയുടെ ആവശ്യം. 

കാലടി സംസ്‌കൃത സര്‍വകലാശാലയിലെ പ്രതിഷേധത്തില്‍ 12 പേരെ തിരിച്ചെടുക്കാന്‍ സിന്‍ഡിക്കേറ്റ് യോഗം തീരുമാനിച്ചു. നേരത്തെ കാലടിയിലെ പ്രതിഷേധത്തില്‍ 16 പേരെയാണ് സസ്‌പെന്‍ഡ് ചെയ്തിരുന്നത്. അതേസമയം, സസ്‌പെന്‍ഷനിലുള്ള ശ്യാംജിത്ത്, ശ്രദ്ധ, കെ വി അഭിജിത്, അര്‍ച്ചന എന്നിവരെ തിരിച്ചെടുക്കില്ല. നടപടി പിന്‍വലിക്കാന്‍ തീരുമാനിച്ച വിദ്യാര്‍ത്ഥികള്‍ 12 പേരും സര്‍വകലാശാലയ്ക്ക് മാപ്പെഴുതി നല്‍കണമെന്ന നിബന്ധന സിന്‍ഡിക്കേറ്റ് മുന്നോട്ടു വെച്ചിട്ടുണ്ട്. 

എറണാകുളം മഹാരാജാസ് കോളജില്‍ മന്ത്രി റോജി എം ജോണിനെ തടഞ്ഞ് പ്രതിഷേധിച്ച എസ്എഫ്‌ഐ നേതാക്കള്‍ക്ക് സസ്‌പെന്‍ഷന്‍. കോളജ് യൂണിയന്‍ ചെയര്‍മാന്‍, വൈസ് ചെയര്‍പേഴ്‌സണ്‍ എന്നിവര്‍ക്കെതിരെയാണ് നടപടി. ഇന്നു ചേര്‍ന്ന കൗണ്‍സില്‍ യോഗത്തിലാണ് തീരുമാനം. സസ്‌പെന്‍ഷന്‍ തീരുമാനത്തിനെതിരെ ക്യാംപസില്‍ എസ്എഫ്‌ഐ പ്രതിഷേധിച്ചു.

 രാജ്യത്തെ ഭരണ-പ്രതിപക്ഷ നേതാക്കള്‍ തമ്മില്‍ വിദേശ സഹായ ആരോപണങ്ങളെച്ചൊല്ലി രൂക്ഷമായ വാക്‌പോര്. പ്രതിപക്ഷം രാജ്യത്തെ അസ്ഥിരപ്പെടുത്താന്‍ വിദേശ സഹായം തേടുന്നുവെന്ന പ്രധാനമന്ത്രി നരേന്ദ്ര മോദിയുടെ ആരോപണത്തിന് മറുപടിയുമായി ലോക്സഭാ പ്രതിപക്ഷ നേതാവ് രാഹുല്‍ ഗാന്ധി രംഗത്തെത്തി. വിദേശ സഹായത്തോടെയാണ് മോദി പ്രധാനമന്ത്രി പദത്തിലെത്തിയതെന്നും ആ സ്ഥാനത്ത് തുടരുന്നതെന്നും ആരോപിച്ച രാഹുല്‍ ഗാന്ധി, വിഷയത്തില്‍ പരസ്യ സംവാദത്തിന് പ്രധാനമന്ത്രിയെ വെല്ലുവിളിച്ചു.