രഞ്ജിത്ത് റിമാൻഡിൽ, സെൻസസിന് ഇന്ന് തുടക്കം, ഇറ്റലി പുറത്ത്; ഇന്നത്തെ 5 പ്രധാന വാർത്തകൾ

ലൈംഗികപീഡനക്കേസില്‍ സംവിധായകന്‍ രഞ്ജിത്തിനെ റിമാന്‍ഡ് ചെയ്തു. സെന്‍സസ് നടപടികള്‍ക്ക് രാജ്യത്ത് ഇന്ന് തുടക്കമാകും. ലോകകപ്പില്‍ നിന്നും ഇറ്റലി പുറത്തായി. ഇന്നത്തെ 5 പ്രധാനവാര്‍ത്തകള്‍ (Top 5 News Today ) അറിയാം

ലൈംഗികാതിക്രമക്കേസില്‍ അറസ്റ്റിലായ സംവിധായകന്‍ രഞ്ജിത്തിനെ 14 ദിവസത്തേക്ക് റിമാന്‍ഡ് ചെയ്തു. എറണാകുളം സബ് ജയിലിലാണ് രഞ്ജിത്തിനെ പാര്‍പ്പിക്കുക. രഞ്ജിത്തിനെ കൊച്ചിയില്‍ മജിസ്‌ട്രേറ്റിന്റെ വസതിയിലെത്തിച്ചാണ് പൊലീസ് റിമാന്‍ഡ് ചെയ്തത്. 

16 വര്‍ഷത്തിനുശേഷം രാജ്യത്ത് നടക്കുന്ന സെന്‍സസിന്റെ ആദ്യഘട്ടത്തിന് ഇന്ന് തുടക്കമാകും. ഡല്‍ഹി, കര്‍ണാടക, ഒഡീഷ, ഗോവ, ലക്ഷദ്വീപ്, മിസോറം, സിക്കിം, ആന്‍ഡമാന്‍ സംസ്ഥാനങ്ങളിലും കേന്ദ്രഭരണപ്രദേശങ്ങളിലുമാണ് ഇന്ന് സെന്‍സസ് ആരംഭിക്കുന്നത്. ഓഗസ്റ്റ് 31 വരെ ഒന്നാം ഘട്ടം തുടരും.  കേരളത്തില്‍ ഒന്നാം ഘട്ടം ജൂണ്‍ 16 ന് തുടങ്ങും.

പുതിയ സാമ്പത്തിക വര്‍ഷം പിറന്നതോടെ പല മേഖലകളിലും മാറ്റങ്ങളും നിലവില്‍ വന്നു. പുതിയ ആദായനികുതി നിയമം ഇന്നുമുതല്‍ പ്രാബല്യത്തിലാകും. ട്രെയിന്‍ ടിക്കറ്റ് റദ്ദാക്കുമ്പോഴുള്ള റീ ഫണ്ടിന് ഇന്നുമുതല്‍ പുതിയ സമയക്രമം. പാന്‍ കാര്‍ഡിനുള്ള അപേക്ഷകള്‍ക്ക് ജനനതീയതി തെളിയിക്കുന്നതിന് കൂടുതല്‍ രേഖകള്‍ നല്‍കേണ്ടി വരും.

നാല് തവണ ഫുട്ബോൾ ലോകകപ്പ് കിരീടം ചൂടിയിട്ടുള്ള അസൂറിപ്പടയ്ക്ക് ഇത്തവണയും യോഗമില്ല. വരാനിരിക്കുന്ന ലോകകപ്പിൽ നിന്നും ഇറ്റലി പുറത്തായി. നിർണായക പ്ലേ-ഓഫ് ഫൈനലിൽ ബോസ്നിയ ഹെർസെഗോവിനയോട് പെനാൽറ്റി ഷൂട്ടൗട്ടിൽ പരാജയപ്പെട്ടതോടെയാണ് ഇറ്റലിയുടെ ലോകകപ്പ് പ്രതീക്ഷകൾ അവസാനിച്ചത്.

ഐപിഎല്ലിൽ ഗുജറാത്ത് ടൈറ്റന്‍സിന് ആദ്യ തോൽവി. കിങ്‌സ് ഇലവന്‍ നാല് വിക്കറ്റിന് ആണ് പഞ്ചാബിന്റെ വിജയം. കൂപ്പർ കനോലിയുടെ വെടിക്കെട്ട് ബാറ്റിങ്ങാണ് പഞ്ചാബിന്റെ വിജയത്തിലേക്ക് നയിച്ചത്. ഗുജറാത്ത് ടൈറ്റൻസ് ഉയർത്തിയ 163 റൺസ് വിജയലക്ഷ്യം അഞ്ച് പന്തുകൾ ബാക്കിനിൽക്കെ പഞ്ചാബ് മറികടന്നു.