'അടിച്ചു പൂസായ' ഡ്രൈവർക്ക് പകരം സ്കാനിയ ബസ് ഓടിച്ചത് ഡ്യൂട്ടി കഴിഞ്ഞ ജീവനക്കാരൻ; യാത്രക്കിടെ വിജിലൻസ് പൊക്കി

തിരുവനന്തപുരം: ആൾമാറാട്ടം നടത്തി കെഎസ്ആർടിസി ബസ് ഓടിച്ച ഡ്രൈവറെ വിജിലൻസ് പിടികൂടി. തിരുവനന്തപുരം- മംഗലാപുരം സ്കാനിയ ബസിൽ ഡ്യൂട്ടിക്ക് നിയോഗിച്ചിരുന്നയാൾക്ക് പകരം ഡ്യൂട്ടി കഴിഞ്ഞ മറ്റൊരു ജീവനക്കാരനാണ് ബസ് ഓടിച്ചിരുന്നത്. 

വഴി മധ്യേയുള്ള പരിശോധനയ്ക്കിടെ ആഭ്യന്തര വിജിലൻസാണ് ആൾമാറാട്ടം പിടികൂടിയത്. ഡ്യൂട്ടിക്ക് നിയോഗിച്ച വിജീഷ് എന്ന ഡ്രൈവർ മദ്യപിച്ചത് കാരണമാണ് പകരം ഡ്യൂട്ടി കഴിഞ്ഞ സന്ദീപ് എന്ന ഡ്രൈവർ ബസോടിച്ചതെന്നാണ് വിജിലൻസിൻറെ കണ്ടെത്തൽ. 

വീഴ്ച വരുത്തിയ ജീവനക്കാരെ സസ്പെൻഡ് ചെയ്യാൻ സിഎംഡി നിർദേശം നൽകി. കെഎസ്ആർടിസി വിജിലൻസ് എക്സിക്യൂട്ടിവ് ഡയറക്ടർ സംഭവത്തിൽ വിശദമായ അന്വേഷണം നടത്തും.