തിരുവനന്തപുരം: യുവാക്കള്‍ക്കും 50 വയസ്സിന് മുകളില്‍ പ്രായമായവര്‍ക്കും ഇടയില്‍ ഏറെ പ്രിയങ്കരര്‍ ശശി തരൂരും കെ കെ ശൈലജയും. 18 നും 24 നും ഇടയില്‍ പ്രായമുള്ളവരില്‍, മുഖ്യമന്ത്രി സ്ഥാനത്തേക്ക് യുഡിഎഫില്‍ ശശി തരൂരിനെ 20.3 ശതമാനം പേരാണ് പിന്തുണയ്ക്കുന്നത്. തൊട്ടുപിന്നിലുള്ള വിഡി സതീശനെ 15.8 ശതമാനം പേരും അനുകൂലിക്കുന്നു. 32.1 ശതമാനം പേര്‍ ഒരു അഭിപ്രായവും രേഖപ്പെടുത്താത്തവരാണ്.
എല്‍ഡിഎഫില്‍ കെ കെ ശൈലജയ്ക്കാണ് യുവാക്കള്‍ക്കിടയില്‍ മുന്‍തൂക്കം. 18 നും 24 നും മധ്യേ പ്രായമുള്ളവരില്‍, 24.6 ശതമാനമാണ് ശൈലജയെ പിന്തുണയ്ക്കുന്നത്. നിലവിലെ മുഖ്യമന്ത്രി പിണറായി വിജയനെ 16. 3 ശതമാനം പേരാണ് പിന്തുണയ്ക്കുന്നത്. സര്‍വേയില്‍ പങ്കെടുത്ത സ്ത്രീകളില്‍ 24 ശതമാനവും ശൈലജയെയാണ് അനുകൂലിക്കുന്നത്. പുരുഷന്മാരില്‍ 25 ശതമാനവും ശൈലജയ്ക്ക് പിന്തുണ നല്‍കുന്നു.
55 വയസ്സിനു മേല്‍ പ്രായമുള്ളവരില്‍ 34.2 ശതമാനം പേര്‍ യുഡിഎഫില്‍ നിന്നും ശശി തരൂരിനെ അനുകൂലിക്കുന്നവരാണ്. വിഡി സതീശനെ 14.6 ശതമാനവും പിന്തുണയ്ക്കുന്നു. അഭിപ്രായം പറയാതെ 22.8 ശതമാനവുമുണ്ട്. സര്‍വേയില്‍ പങ്കെടുത്ത സ്ത്രീകളില്‍ 27 ശതമാനവും പുരുഷന്മാരില്‍ 30 ശതമാനവും തരൂരിനെ അനുകൂലിക്കുന്നുണ്ട്.
അതേസമയം എല്‍ഡിഎഫില്‍, 55 വയസ്സിന് മേല്‍ പ്രായമുള്ളവര്‍ക്കിടയില്‍ മുഖ്യമന്ത്രി സ്ഥാനത്തേക്ക് പിണറായി വിജയനേക്കാള്‍ നേരിയ മുന്‍തൂക്കമാണ് കെ കെ ശൈലജയ്ക്കുള്ളത്. ശൈലജയെ 25.3 ശതമാനം പേരാണ് പിന്തുണയ്ക്കുന്നത്. അതേസമയം പിണറായി വിജയനെ 22.1 ശതമാനവും പിന്തുണയ്ക്കുന്നു. അഭിപ്രായം രേഖപ്പെടുത്താതെ 37.4 ശതമാനം പേരുമുണ്ട്. മുഖ്യമന്ത്രി സ്ഥാനത്തേക്ക് ( യുവാക്കള്‍ക്കും 55 വയസ്സിനു മുകളിലും ) നിലവിലെ സംസ്ഥാന സെക്രട്ടറി എം വി ഗോവിന്ദനെ പിന്തുണയ്ക്കുന്നവര്‍ രണ്ടു ശതമാനത്തില്‍ താഴെ മാത്രമാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
