തിരുവനന്തപുരം: സംസ്ഥാനത്ത് വീണ്ടും നിപ സ്ഥിരീകരിച്ച പശ്ചാത്തലത്തില് മുന് സര്ക്കാരിന്റെ കാലത്ത് ഇന്നത്തെ ആരോഗ്യമന്ത്രി കെ മുരളീധരന് നടത്തിയ പ്രസംഗം കുത്തിപ്പൊക്കി സോഷ്യല്മീഡിയ. പിണറായി വിജയന് സര്ക്കാര് ഭരിക്കുന്ന സമയത്ത് നിപ രോഗം റിപ്പോര്ട്ട് ചെയ്തപ്പോള് കോണ്ഗ്രസ് നേതാവ് മുരളീധരന് ഭരണത്തിലുള്ളവരെ പരിഹസിച്ച് നടത്തിയ പരാമര്ശമാണ് ഇപ്പോള് സാമൂഹിക മാധ്യമങ്ങള് ഏറ്റെടുത്ത് വിമര്ശിക്കുന്നത്. 'എരണം കെട്ടവന് നാട് ഭരിച്ചാല് നാട് മുടിയും' എന്ന മുരളീധരന്റെ പഴയ പ്രസംഗമാണ് സോഷ്യല്മീഡിയ കുത്തിപ്പൊക്കിയത്. മുരളീധരന് അന്ന് പറഞ്ഞത് ഇപ്പോള് സത്യമായെന്നും ഇക്കാര്യത്തില് 100 ശതമാനം കെ മുരളീധരന് സാറിനൊപ്പമെന്നും എല്ലാം പരിഹസിച്ച് സോഷ്യല്മീഡിയയില് ട്രോളുകള് നിറയുകയാണ്.
'പണ്ടൊരു ചൊല്ലുണ്ട്. എരണം കെട്ടവന് നാട് ഭരിച്ചാല് നാട് മുടിയും. ഓണം ആഘോഷിച്ചിട്ട് കാലം മറന്നു. ഇതുവരെ കേള്ക്കാത്ത രോഗങ്ങള്. നിപ. വവ്വാല് ആണത്രേ നിപ പരത്തുന്നത്. കെ കരുണാകരനും എ കെ ആന്റണിയും ഉമ്മന് ചാണ്ടിയും ഭരിച്ചിരുന്ന കാലത്ത് വവ്വാല് ഉണ്ടായില്ലേ നമ്മുടെ നാട്ടില്. ഇപ്പോ എന്താണ് നിപ ഉണ്ടാവാന് കാരണം. ഭരിക്കുന്നവന് ശരിയല്ല. അതുകൊണ്ട് തന്നെയാണ്'- കെ മുരളീധരന്റെ പഴയ പ്രസംഗത്തിലെ വിവാദ പരാമര്ശം.
കഴിഞ്ഞ സര്ക്കാരിന്റെ കാലത്ത് നിപയെക്കുറിച്ച് ഇന്നത്തെ ആരോഗ്യ മന്ത്രി കെ മുരളീധരന് നടത്തിയ പ്രസംഗം ഇന്ന് പലരും തനിക്ക് അയച്ചു തന്നു. അതിനെക്കുറിച്ച് ഇവിടെ ഒന്നും എഴുതുന്നില്ല. ശരിതെറ്റുകള് കാലം തെളിയിക്കട്ടെ എന്നാണ് രണ്ടാം പിണറായി സര്ക്കാരില് ആരോഗ്യമന്ത്രിയായിരുന്ന വീണാ ജോര്ജ് ഫെയ്സ്ബുക്കില് കുറിച്ചത്. രോഗങ്ങളുടെ പ്രതിസന്ധികളിലും വെല്ലുവിളികളിലും ജനങ്ങളെ ചേര്ത്ത് പിടിച്ച് ഏറ്റവും മികച്ച ശാസ്ത്രീയ പ്രതിരോധം തീര്ക്കുക എന്നതാണ് അനിവാര്യം . അതിന് ഒറ്റക്കെട്ടായി നില്ക്കുക എന്നതാണ് ഇടതുപക്ഷസമീപനമെന്നും അവര് കുറിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
