ടിപ്പര്‍ ലോറി കാലിലൂടെ കയറിയിറങ്ങി; അംഗപരിമിതന്റെ കാല്‍ അറ്റു

കാലടി: വാഹനാപകടത്തിൽ മുച്ചക്ര വാഹന യാത്രക്കാരന്റെ കാൽ അറ്റുപോയി. ഇടിച്ചിട്ട ടിപ്പർ ലോറി കാലിലൂടെ കയറിയിറങ്ങിയാണ് ​ഗുരുതരമായി പരിക്കേറ്റത്.

പൊതിയക്കര വാളാഞ്ചേരി വീട്ടിൽ ബേബി (59) ആണ് അപകടത്തിൽപ്പെട്ടത്.  ചെറുപ്പത്തിലേ പോളിയോ വന്ന് ബേബിയുടെ ഒരു കാലിന് സ്വാധീനം നഷ്ടപ്പെട്ടതാണ്.  വ്യാഴാഴ്ച വൈകീട്ട് നാല് മണിയോടെ എംസി റോഡിൽ കാലടി ഫാർമേഴ്‌സ് ബാങ്കിന് മുമ്പിലാണ് അപകടമുണ്ടായത്. 

ഇടിയുടെ ആഘാതത്തിൽ മുച്ചക്ര വാഹനത്തിൽ നിന്ന് തെറിച്ച് റോഡിൽ വീണപ്പോൾ ടിപ്പറിന്റെ ടയർ കാലിലൂടെ കയറിയിറങ്ങി. വലത് കാൽമുട്ടിന് താഴെ അരഞ്ഞുപോയി. നാട്ടുകാരും പോലീസും ചേർന്ന് അങ്കമാലിയിലെ സ്വകാര്യ ആശുപത്രിയിൽ എത്തിച്ചു. പിന്നാലെ വിദഗ്ദ്ധ ചികിത്സയ്ക്കായി എറണാകുളത്തെ ആശുപത്രിയിലേക്ക് മാറ്റി. പൊതിയക്കരയ്ക്കടുത്ത് പെട്ടിക്കട നടത്തിയാണ് ബേബി ഉപജീവനം നടത്തിവന്നത്.