തിരുവനന്തപുരം: ഹേമ കമ്മിറ്റി റിപ്പോര്ട്ട് പുറത്തുവിടരുതെന്ന് നിയമമന്ത്രിയോട് ആവശ്യപ്പെട്ടിട്ടില്ലെന്ന് ഡബ്ല്യുസിസി അംഗം ദീദി ദാമോദരന്. ഹേമ കമ്മിറ്റി റിപ്പോര്ട്ട് പുറത്തുവിടണമെന്നു തന്നെയാണ് സിനിമാ മേഖയിലെ വനിതാ കൂട്ടായ്മയായ ഡബ്ല്യുസിസിയുടെ നിലപാട്. അതേസമയം പരാതിക്കാരികളുടെ സ്വകാര്യത സംരക്ഷിച്ചുകൊണ്ടാകണം റിപ്പോര്ട്ട് പുറത്തു വിടേണ്ടതെന്നും ദീദി ദാമോദരന് വ്യക്തമാക്കി.
റിപ്പോര്ട്ട് പ്രസിദ്ധീകരിക്കണമെന്നു തന്നെയാണ് ഡബ്ല്യുസിസിയുടെ നിലപാട്. ഇക്കാര്യം ആവശ്യപ്പെട്ട് അധികാരികള്ക്ക് ഔദ്യോഗികമായി കത്തു മുഖേനയും നല്കിയിട്ടുണ്ട്. വനിതാ കമ്മീഷനുമായുള്ള കൂടിക്കാഴ്ചയില് താനും പങ്കെടുത്തിരുന്നു. അന്ന് നല്കിയതിന് സമാനമായ കത്തു തന്നെയാണ് മന്ത്രിക്കും നല്കിയതെന്ന് ദീദി ദാമോദരന് പറഞ്ഞു.
മന്ത്രിയുമായി ചര്ച്ച നടത്തിയവരുമായി സംസാരിച്ചതില് നിന്നും മനസ്സിലാകുന്നത്, അവര് മന്ത്രിയുമായുള്ള ചര്ച്ചയില് പരാതിക്കാരികളുടെ സ്വകാര്യത, സംഭവ സ്ഥലം, സമയം, മൊഴികള് തുടങ്ങിയവ പുറത്തുവരുന്നതില് വേവലാതികള് അറിയിച്ചിരുന്നു. ഇതില് പേരുകള് ഉള്പ്പെടുത്തിയില്ലെങ്കിലും ആളെ തിരിച്ചറിയാന് ഇടയാക്കില്ലേ എന്ന ആശങ്കയും പങ്കുവെച്ചിരുന്നു. കോണ്ഫിഡന്ഷ്യല് ആയ വസ്തുതകള് ഒഴിവാക്കിക്കൊണ്ട്, റിപ്പോര്ട്ട് പുറത്തു വിടണമെന്നു തന്നെയാണ് സംഘടനയുടെ റിക്വസ്റ്റെന്നും ദീദി ദാമോദരന് പറഞ്ഞു.
സിനിമ മേഖലയിലെ സ്ത്രീകള് നേരിടുന്ന പ്രശ്നങ്ങളെക്കുറിച്ചും ചൂഷണങ്ങളെക്കുറിച്ചും അന്വേഷിച്ച ഹേമ കമ്മിറ്റി റിപ്പോര്ട്ട് പുറത്തുവിടരുതെന്ന് സിനിമാ മേഖയിലെ വനിതാ കൂട്ടായ്മയായ ഡബ്ല്യുസിസി ആവശ്യപ്പെട്ടതായുള്ള നിയമമന്ത്രി പി രാജീവിന്റെ വെളിപ്പെടുത്തലാണ് ചര്ച്ചയായത്. ഒരു ഇംഗ്ലീഷ് മാധ്യമത്തിന് നല്കിയ അഭിമുഖത്തിലാണ് മന്ത്രിയുടെ വെളിപ്പെടുത്തല്.
ജസ്റ്റിസ് ഹേമ കമ്മിറ്റി റിപ്പോര്ട്ടുമായി ബന്ധപ്പെട്ട് ഡബ്ല്യുസിസിയുമായി താന് ചര്ച്ച നടത്തിയിരുന്നു. ഈ റിപ്പോര്ട്ട് പ്രസിദ്ധീകരിക്കരുതെന്ന് അവര് ആവശ്യപ്പെട്ടു എന്നുമാണ് മന്ത്രി വെളിപ്പെടുത്തുന്നത്. കമ്മീഷന് ഓഫ് എന്ക്വയറി ആക്ട് പ്രകാരമുള്ള അന്വേഷണ കമ്മീഷനല്ല ഹേമ കമ്മിറ്റി എന്നതിനാല്, അതിന്റെ റിപ്പോര്ട്ട് പുറത്തുവിടണമെന്നില്ല എന്നും മന്ത്രി വ്യക്തമാക്കുന്നു.
നിയമമന്ത്രാലയത്തിലേക്ക് സമിതിയുടെ നിര്ദേശങ്ങള് കൈമാറിയിട്ടുണ്ട്. അത് പരിശോധിച്ചു വരികയാണ്. അത് സാംസ്കാരിക വകുപ്പിന് കൈമാറിയശേഷം നടപടി സ്വീകരിക്കും. വേണമെങ്കില് പുതിയ നിയമത്തെക്കുറിച്ചും പരിശോധിക്കാവുന്നതാണെന്നും മന്ത്രി അഭിമുഖത്തില് പറയുന്നു.
ഈ വാര്ത്ത കൂടി വായിക്കാം
സമകാലിക മലയാളം ഇപ്പോൾ വാട്ട്സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
