അട്ടപ്പാടിയില്‍ രണ്ടിടത്ത് കാട്ടാന ആക്രമണം: മൂന്നുപേര്‍ക്ക് പരിക്ക്

പാലക്കാട്: അട്ടപ്പാടിയില്‍ രണ്ടിടത്തായി കാട്ടാന ആക്രമണം. മുള്ളിയില്‍ പുഴയ്ക്കരികെ കാട്ടാന ആക്രമണത്തില്‍ പരിക്കേറ്റ വെള്ളിങ്കീരിയെ ആശുപത്രിയില്‍ പ്രവേശിപ്പിച്ചു. ഗൂളിക്കടവ് എന്ന സ്ഥലത്ത് ഓട്ടോറിക്ഷാ യാത്രക്കാരെയാണ് കാട്ടാന ആക്രമിച്ചത്.

അട്ടപ്പാടി മുള്ളിയില്‍ പുലര്‍ച്ചെയാണ് വെള്ളിങ്കീരിയെന്ന ആദിവാസി യുവാവിനെ കാട്ടാന ആക്രമിച്ചത്. പുഴയ്ക്ക് അരികിലേക്ക് പോകുമ്പോഴാണ് വെള്ളിങ്കീരിക്കു നേരെ ആക്രമണം ഉണ്ടായത്.

അട്ടപ്പാടി ചിറ്റൂര്‍ ഗൂളിക്കടവില്‍ ഓട്ടോറിക്ഷയില്‍ പോകുകയായിരുന്ന രണ്ടുപേര്‍ക്ക് നേരെയാണ് ആനയുടെ ആക്രമണം ഉണ്ടായത്. ഓട്ടോയാത്രക്കാരിയായ മിനി ഷാജി, ഓട്ടോ ഡ്രൈവര്‍ പ്രസാദ് എന്നിവര്‍ക്കാണ് പരിക്കേറ്റത്. മൂന്നുപേരെയും കോട്ടത്തറ ട്രൈബല്‍ ആശുപത്രിയില്‍ പ്രവേശിപ്പിച്ചു.