മിഷന്‍ സമുദ്ര ഹിറ്റാകുമോ?, വീര്യം കുറഞ്ഞ മദ്യത്തില്‍ തീരുമാനമെടുത്തിട്ടില്ലെന്ന് മന്ത്രി, ഹോര്‍മൂസ് വീണ്ടും അടച്ചു; ഇന്നത്തെ 5 പ്രധാന വാര്‍ത്തകള്‍

കേരളത്തില്‍ വീര്യം കുറഞ്ഞ മദ്യം വില്‍ക്കണോ വേണ്ടയോ എന്നതില്‍ നയപരമായ തീരുമാനം എടുത്തിട്ടില്ലെന്ന് എക്‌സൈസ് മന്ത്രി എം ലിജു. ലാലേട്ടന്റെ കഥയ്ക്ക് വി ഡി സതീശന്റെ തിരക്കഥ 'മിഷൻ സമുദ്ര' ഹിറ്റാവുമോ?. ആശങ്കയായി പകർച്ചപ്പനി പടരുന്നു. ഹോർമൂസ് കടലിടുക്ക് വീണ്ടും അടച്ച് ഇറാൻ. ഇന്നത്തെ 5 പ്രധാന വാര്‍ത്തകള്‍ ( Top 5 News today ) അറിയാം.

കേരളത്തില്‍ വീര്യം കുറഞ്ഞ മദ്യം വില്‍ക്കണോ വേണ്ടയോ എന്നതില്‍ നയപരമായ തീരുമാനം എടുത്തിട്ടില്ലെന്ന് എക്‌സൈസ് മന്ത്രി എം ലിജു. 0.5 ശതമാനം മുതല്‍ 20 ശതമാനം വരെ വീര്യമുള്ള മദ്യത്തെ, വീര്യം കുറഞ്ഞ മദ്യമായി ക്ലാസിഫൈ ചെയ്തത് ഇടതുപക്ഷ സര്‍ക്കാരാണ്. കേരളത്തില്‍ വീര്യം കുറഞ്ഞ മദ്യം എന്ന ആശയം കൊണ്ടുവന്ന്, അതിനെ നടപ്പില്‍ വരുത്തിയ എല്‍ഡിഎഫ് ഇപ്പോള്‍ അതിനെ കുറ്റപ്പെടുത്തുന്നതിനു പിന്നിലെ സാംഗത്യം എന്താണെന്ന് മന്ത്രി ലിജു ചോദിച്ചു.

മികച്ച സമ്പദ്‌വ്യവസ്ഥയും ലോകോത്തര പശ്ചാത്തല സൗകര്യങ്ങളുമുള്ള സിംഗപ്പൂർ പോലെ കേരളവും വികസിതമാവുന്നൊരു സ്വപ്‌നമുണ്ട് മലയാളികളുടെ പ്രിയ നടൻ മോഹൻലാലിന്. പുതിയൊരു വികസിത കേരളത്തെക്കുറിച്ചുള്ള തന്റെ സ്വപ്‌നം അദ്ദേഹം പങ്കുവച്ചത് അടുത്തിടെയാണ്. സിംഗപ്പൂരിന്റെ വിജയകഥയാണ് മിഷൻ സമുദ്രയുടെ പ്രചോദനമെന്ന് മുഖ്യമന്ത്രി വെളിപ്പെടുത്തിയത് 'ദി ന്യൂ ഇന്ത്യൻ എക്‌സ്പ്രസി'ലൂടെയാണ്. 

മുഖ്യമന്ത്രി വി ഡി സതീശനെ വിമര്‍ശിച്ച് എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായര്‍. മുഖ്യമന്ത്രി വി ഡി സതീശനുമായി കൂടിക്കാഴ്ചയ്ക്ക് അനുമതി ലഭിക്കാത്തതില്‍ അതൃപ്തി പ്രകടിപ്പിച്ച ജി സുകുമാരന്‍ നായര്‍ പുതിയ മുഖ്യമന്ത്രി അഹങ്കാരിയാണെന്ന് കുറ്റപ്പെടുത്തി. ഇനി മുഖ്യമന്ത്രിയുടെ കാല് പിടിക്കാന്‍ ഇല്ലെന്നും സുകുമാരന്‍ നായര്‍ പറഞ്ഞു.

സംസ്ഥാനത്ത് ഇന്ന് 13 പേര്‍ക്ക് കൂടി ഷിഗെല്ല സ്ഥിരീകരിച്ചു. ആശങ്കയായി പകര്‍ച്ചപ്പനിയും പടരുന്നു. പനി ബാധിച്ച് ഇന്ന് മൂന്നുപേരാണ് സംസ്ഥാനത്ത് മരിച്ചത്. സംസ്ഥാനത്ത് 75 പേര്‍ക്ക് ഡെങ്കിപ്പനിയും സ്ഥിരീകരിച്ചു. ഈ മാസം 11 പേര്‍ ഡെങ്കിപ്പനി ബാധിച്ച് മരിച്ചിട്ടുണ്ട്. കൂടാതെ 13 പേര്‍ക്ക് എലിപ്പനിയും സ്ഥിരീകരിച്ചിട്ടുണ്ട്.

ലെബനനിലെ ഇസ്രയേൽ ആക്രമണത്തിൽ പ്രതിഷേധിച്ച് ഹോർമൂസ് കടലിടുക്ക് ഇറാൻ വീണ്ടും അടച്ചു. അമേരിക്കയും ഇസ്രയേലും വെടിനിർത്തൽ കരാർ ലംഘിച്ചതിനോടുള്ള പ്രതിഷേധമായിട്ടാണ് നടപടിയെന്നാണ് ഇറാൻ വ്യക്തമാക്കിയത്. ഇസ്രയേലിനോട് ആക്രമണം ഉടൻ അവസാനിപ്പിക്കാൻ യുഎസ് നിർദേശിക്കണമെന്നും ഇറാൻ ആവശ്യപ്പെട്ടു. അമേരിക്കയുമായി സമാധാനക്കരാർ ഒപ്പുവച്ച് ദിവസങ്ങൾക്കകമാണ് വീണ്ടും പശ്ചിമേഷ്യയിൽ അശാന്തി ഉടലെടുക്കുന്നത്.