അങ്കമാലിയില്‍ സ്വകാര്യബസ്സും ഓട്ടോറിക്ഷയും കൂട്ടിയിടിച്ചു; യാത്രക്കാരും ഡ്രൈവറുമടക്കം നാല് മരണം

അങ്കമാലി: അങ്കമാലിയില്‍ വാഹനാപകടത്തില്‍ നാല് മരണം. സ്വകാര്യബസ്സും ഓട്ടോറിക്ഷയും കൂട്ടിയിടിച്ചാണ് അപകടമുണ്ടായത്. ഓട്ടോയില്‍ സഞ്ചരിച്ച മൂന്ന് സ്ത്രീകളും ഓട്ടോ ഡ്രൈവറുമാണ് മരിച്ചത്. 

ദേശീയപാതയില്‍ ഇന്ന് രാവിലെ ഏഴ് മണിയോടെയാണ് അപകടമുണ്ടായത്. ബസ്സിനടിയില്‍ പെട്ടുപോയ ഓട്ടോ പൊലീസും ഫയര്‍ഫോഴ്‌സും ചേര്‍ന്ന് വെട്ടിപൊളിച്ചാണ് ആളുകളെ പുറത്തെത്തിച്ചത്. ഇവരെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. ഇടിയുടെ ആഘാതത്തില്‍ ഓട്ടോറിക്ഷ പൂര്‍ണ്ണമായും തകര്‍ന്നു.