ഇനി പുകപരിശോധന സർട്ടിഫിക്കറ്റ് മോട്ടോർവാഹനവകുപ്പിൽനിന്ന്; നടപടികൾ ഓൺലൈനിൽ 

കൊച്ചി: പുകപരിശോധന സർട്ടിഫിക്കറ്റ് അടുത്തമാസംമുതൽ മോട്ടോർവാഹനവകുപ്പ് നൽകും. പുകപരിശോധനയുമായി ബന്ധപ്പെട്ട തർക്കങ്ങൾ തുടരുന്നതിനാലാണ് നടപടി. പുകപരിശോധന നിലവിൽ നടക്കുന്നതു പോലെ പരിശോധനകേന്ദ്രങ്ങളിൽ തുടരുകയും ബാക്കി നടപടികൾ ഓൺലൈനിൽ പൂർത്തിയാക്കി മോട്ടോർവാഹനവകുപ്പ് സർട്ടിഫിക്കറ്റ് നൽകുന്ന രീതിയാണ് ഇനി. 

ബിഎസ് ഫോർ വാഹനങ്ങൾക്ക് ഒരുവർഷം കാലാവധിയുള്ള സർട്ടിഫിക്കറ്റ് നൽകേണ്ടതാണെങ്കിലും ഇപ്പോഴും ആറുമാസത്തെ സർട്ടിഫിക്കറ്റുകൾ നൽകുന്നതാണ് തർക്കത്തിനുകാരണം.ആറ് മാസത്തിന് ഇടയിൽ നൽകിയ സർട്ടിഫിക്കറ്റുകളുടെ കാലാവധി ഒരു വർഷമാക്കി പുതുക്കി നൽകാൻ ഗതാഗത കമ്മിഷണർ നിർദേശം നൽകിയിരുന്നു. 

ബിഎസ് ഫോർ വിഭാഗത്തിലെ ഇരുചക്ര, മുച്ചക്ര വാഹനങ്ങൾക്ക് ഒരു വർഷത്തെ സർട്ടിഫിക്കറ്റാണോ നൽകേണ്ടത് എന്നതിൽ വ്യക്തത ഇല്ലെന്നാണ് പരിശോധനാ കേന്ദ്രങ്ങൾ പറയുന്നത്. ഇത്തരം പ്രശ്നങ്ങൾ മോട്ടോർവാഹനവകുപ്പ് നേരിട്ടിടപെടുമ്പോൾ പരിഹരിക്കാനാകുമെന്ന് അധിക‌‍‌ൃതർ അറിയിച്ചു.